Körfubolti

Móðir heiðruð og ljótur oln­bogi

Valur Páll Eiríksson skrifar
Edwards fór fyrir Úlfunum og tileinkaði móður sinni sigurinn.
Edwards fór fyrir Úlfunum og tileinkaði móður sinni sigurinn. Carlos Gonzalez/The Minnesota Star Tribune via Getty Images

Anthony Edwards var hetjan en Victor Wembanyama skúrkurinn í 114-109 sigri Minnesota Timberwolves í undanúrslitum Vesturdeildar NBA í Minneapolis í nótt.

„Í dag er mæðradagur og ég vildi bara vinna fyrir mömmu, það er svo einfalt,“ sagði Edwards í óspurðum fréttum á blaðamannafundi eftir leik næturinnar.

Móðir hans, Yvette Edwards, lést úr krabbameini árið 2015 en Shirley Edwards, móðir hennar og amma Anthony, lést úr krabbameini átta mánuðum síðar.

Edwards kveðst klæðast treyju númer 5 til að heiðra minningu mæðgnanna sem báðar féllu frá á fimmta degi mánaðar.

„Ég gat ekki tapað þessum leik á þessum degi,“ sagði Edwards enn fremur eftir leikinn.

Edwards skoraði 36 stig, flest á vellinum, í 114-109 sigri hans manna í Timberwolves á Spurs í Minneapolis í nótt. Úrslitin þýða að staðan í einvíginu er jöfn, 2-2.

Þá munaði um Frakkann Victor Wembanyama í liði Spurs í nót þar sem honum var hent út úr húsi snemma í öðrum leikhlutanum. Í baráttu um frákast negldi hann olnboganum í andlit Naz Reed, miðherja Úlfanna.

Um var að ræða fyrsta skipti á ferli unga Frakkans sem hann er útilokaður frá leik.

Það stefnir í spennandi seríu en í öðrum leik næturinnar var spennan minni. New York Knicks unnu 30 stiga sigur á Philadelphia 76ers til að sópa einvígi liðanna 4-0.

Knicks er því komið í úrslit Austurdeildarinnar þar sem annað hvort Detroit Pistons eða Cleveland Cavaliers verða andstæðingurinn. Detroit leiðir 2-1 þar.

Allt bendir til að sigurliðið úr einvígi Minnesota og San Antonio mætir Oklahoma City Thunder í úrslitum Vesturdeildarinnar. OKC leiðir einvígi við Los Angeles Lakers 3-0 fyrir leik fjögur í nótt.

NBA



Fleiri fréttir

Sjá meira


×