Nær Spieth loksins að loka hringnum?

Aðeins sex kylfingar í sögunni hafa afrekað það að vinna öll fjögur risamótin. Spieth hefur fengið nokkur ár til þess að loka hringnum en án árangurs.

Hinn 32 ára gamli Spieth skaust með ljóshraða fram á sjónarsviðið er hann vann Masters og US Open árið 2015. Þá aðeins 21 árs. Tveimur árum síðar stóð hann uppi sem sigurvegari á Opna breska og golfheimurinn var hans. Síðan þá hefur ekkert gengið hjá honum.

Spieth hefur ekki unnið mót á PGA-mótaröðinni síðan 2022. Hann hefur ekki náð inn á topp tíu á tólf mótum á þessu keppnistímabili. Hann fór í aðgerð á úlnlið á síðasta ári og hefur nú náð fullri heilsu.

Hann er að reyna við PGA-meistaramótið í tíunda sinn og er bjartsýnn.

„Það væri ótrúlegt ef mér tækist að vinna mótið. Það eru svo fáir sem hafa afrekað að vinna öll fjögur risamótin. Ég hef verið að spila vel en ekki tekist að tengja allt saman. Ég er að spila gott golf og vonandi tekst mér að láta allt smella,“ sagði Spieth.

PGA-meistaramótið verður í beinni útsendingu á Sýn Sport Viaplay.