„Þá hefði ég tekið því og hlaupið í burtu“

Ragnhildur er ein þeirra sem ekki spila á fyrsta móti GSÍ-mótaraðarinnar, Reykjanesmótinu, nú um helgina vegna móts í Austurríki. Hún spilar á LET Access mótaröðinni í sumar, þeirri næststerkustu í Evrópu, eftir að hafa verið eins nálægt því og hugsast gæti að tryggja sig inn á sjálfa Evrópumótaröðina í fyrra.

Segja má að einu höggi hafi munað, eftir allt keppnistímabilið þar sem Ragnhildur náði þó meðal annars að vinna mót á LET Access mótaröðinni, fyrst Íslendinga.

Miklar framfarir og meiri virðing

„Þetta sýnir hvað það er stutt á milli í þessu. Hefðir þú spurt mig í apríl í fyrra hvort ég myndi þiggja að vinna eitt mót og enda tvisvar í 2. sæti, þá hefði ég tekið því og hlaupið í burtu. En þegar maður endar svo í október tveimur stigum [eða einu höggi] frá því að fá fullt kort á Evrópumótaröðinni þá er það súrsætt.

En maður reynir að horfa björtum augum á þetta og sjá hvað maður er að taka miklum framförum. Fá meiri virðingu innan mótaraðarinnar,“ segir Ragnhildur. Hún er þó með takmarkaðan keppnisrétt á Evrópumótaröðinni og þarf að vera viðbúin því að fljúga af stað með skömmum fyrirvara, þegar boð fæst um að spila þar:

„Lífið er á Dohop. Maður kíkir á flug til að sjá hvar er einfaldast og ódýrast að ferðast. En maður velur sér þetta og þetta er það skemmtilegasta sem maður gerir,“ segir Ragnhildur en viðtalið við hana má sjá í spilaranum hér að neðan.

Hægt að koma frá litla Íslandi og spila gott golf

Það hlýtur að vera ánægjulegt að hafa brotið það blað fyrir Íslendinga að vinna mót á LET Access?

„Það er það en svo verður að horfa í að það komu fleiri á undan manni sem sýndu að það er hægt að koma frá litla Íslandi og spila gott golf. Þó við séum lítil þjóð erum við ágætlega góð í golfi og það er mjög skemmtilegt að geta sýnt það á heimsvísu,“ segir Ragnhildur og bendir á yngri áhugakylfinga sem náð hafa langt nú þegar:

„Perla [Sól Sigurbrandsdóttir] og Gulli [Gunnlaugur Árni Sveinsson] eru að brjóta blöð í íslenskri golfsögu og að sjá það utan frá er mjög gaman. Maður hefði viljað geta gert það sjálfur en að geta vonandi líka ýtt þeim meira áfram er mjög skemmtilegt.“