Uppsagnir hjá Bláa lóninu

Bjarki Sigurðsson skrifar 28. maí 2026 11:34

Eftir breytingu eru 778 stöðugildi hjá Bláa lóninu. Vísir/Vilhelm

Uppsagnir hafa staðið yfir í morgun í Bláa lóninu. 29 stöðugildi verða lögð niður og 55 starfsmenn flytja milli sviða. Forstjóri fyrirtækisins segir markmiðið að skerpa á hlutverki móðurfélags lónsins.

Þetta kemur fram í tilkynningu frá fyrirtækinu en Sigríður Margrét Oddsdóttir staðfestir tíðindin einnig í samtali við fréttastofu. Hún vildi að öðru leyti ekki tjá sig heldur vísaði í tilkynninguna.

Þar segir að ráðið verði í ný störf sem ekki voru til áður innan fyrirtækisins en skipurit félagsins verður uppfært samhliða breytingunum.

„Markmið breytinganna eru fyrst og fremst að skerpa á hlutverki móðurfélagsins í þjónustu sinni við dótturfélögin, við viljum gera skilin á milli kjarnastarfsemi og stoðstarfsemi skýrari, auka áherslu á sölu og markaðssetningu með tækni, tryggja örugga framkvæmd þróunar- og fjárfestingaverkefna en á sama tíma sækja nauðsynlega hæfni til þess að ná árangri í framtíðinni,“ er haft eftir Sigríði Margréti Oddsdóttur, forstjóra Bláa lónsins, í tilkynningunni.

Hún sjái eftir góðu samstarfsfólki sem hefur staðið sig mjög vel og óskar hún því alls hins besta.

Stöðugildi fyrirtækisins voru 807 fyrir breytingu en verða nú 778. Í höfuðstöðvum félagsins starfa 116 en engar breytingar voru gerðar á rekstri dótturfélaga innan samstæðunnar.

Hér fyrir neðan má lesa yfirlýsinguna í heild sinni.

Starfsmönnum Bláa Lónsins voru í dag kynntar skipulagsbreytingar í höfuðsstöðvum félagsins. Breytingarnar fela það í sér að 29 stöðugildi verða lögð niður, 55 starfsmenn flytjast á milli sviða og ráðið verður í ný störf sem ekki voru til innan félagsins. Skipurit félagsins verður uppfært samhliða breytingum.

„Markmið breytinganna eru fyrst og fremst að skerpa á hlutverki móðurfélagsins í þjónustu sinni við dótturfélögin, við viljum gera skilin á milli kjarnastarfsemi og stoðstarfsemi skýrari, auka áherslu á sölu og markaðssetningu með tækni, tryggja örugga framkvæmd þróunar- og fjárfestingaverkefna en á sama tíma sækja nauðsynlega hæfni til þess að ná árangri í framtíðinni“ segir Sigríður Margrét Oddsdóttir forstjóri Bláa Lónsins. „Í dag sjáum við á eftir góðu samstarfsfólki sem hefur staðið sig mjög vel og við óskum alls hins besta“ segir hún enn fremur.

Heildarfjöldi stöðugilda hjá samstæðunni lækkar úr 807 í 778 við breytingarnar og eftir þær starfa alls 116 í höfuðstöðvum félagsins, engar breytingar voru gerðar á rekstri dótturfélaga innan samstæðunnar.

Bláa lónið Vinnumarkaður Grindavík Ferðaþjónusta Sundlaugar og baðlón

Mest lesið

Fleiri fréttir