Sam­þykktu tíu milljarða arð­greiðslu sama dag og greint var frá upp­sögnum

Kvika veitir meðal annars fjármálaþjónustu undir merkjum Auðar, Aurs, Lykils og Netgírós en starfar sömuleiðis sem fjárfestingarbanki. 

Stjórnendur greiddu 27 milljarða króna til hluthafa í fyrra og samþykkt var 18. mars síðastliðinn að greiða tæplega 1,6 milljarða króna arð vegna rekstrarársins 2025. Ofan á það bætist sérstaka arðgreiðslan en samanlagt eru þetta rúmar 38.566 milljónir króna frá byrjun síðasta árs. 

„Í dag áttu sér stað 11 sársaukafullar uppsagnir og jafnframt hefur verið tekin ákvörðun um að ráða ekki í stöður sem hafa losnað og munu losna á næstu mánuðum. Fækkun starfsfólks hefur náð til nánast allra eininga bankans,“ sagði í tilkynningu Kviku um hagræðingaraðgerðir bankans fyrr í dag.

Breytt og krefjandi umhverfi var sagt kalla á stöðugt aðhald í rekstri, þrátt fyrir umtalsverðan vöxt á flestum sviðum bankans.

„Gert er ráð fyrir að þessi fækkun stöðugilda muni leiða til kostnaðarlækkunar sem nemur tæplega 400 milljónum króna á ársgrundvelli. Einskiptiskostnaður vegna uppsagna nemur rúmlega 100 milljónum króna, sem gjaldfærðar verða á öðrum fjórðungi ársins,“ sagði jafnframt um hagræðingaraðgerðirnar.

Högnuðust um tæpa tvo milljarða á fyrsta ársfjórðungi

Stjórnendur Kviku greindu frá því 12. maí að hagnaður af áframhaldandi starfsemi samstæðunnar fyrir skatta hafi numið 1,8 milljörðum króna á fyrsta ársfjórðungi þessa árs. Var þetta 158 prósenta aukning frá sama tímabili í fyrra. 

Þá sagði Ármann Þorvaldsson, forstjóri Kviku, að fyrsti ársfjórðungur hafi verið mjög góður í rekstri bankans, vaxtatekjur haldið áfram að aukast, kostnaðaraðhald farið að skila sér og áfram væri góður vöxtur í lykilþáttum starfseminnar.

Árið 2025 nam hagnaður Kviku af áframhaldandi starfsemi 6,2 milljörðum króna fyrir skatta og var talan 5,8 milljarðar króna árið 2024.

Samhliða árshlutauppgjörinu í maí var tilkynnt að stjórn bankans hefði boðað til hluthafafundar þann 4. júní þar sem umrædd arðgreiðsla yrði lögð til. Miðað yrði við 2,35 krónur á hvern hlut sem samsvari rúmum 10 milljörðum króna. 

Tillagan var svo samþykkt á hluthafafundinum í dag með öllum greiddum atkvæðum, að því er fram kemur í tilkynningu.

Greiddu út 27 milljarða í fyrra

„Á aðalfundi 18. mars kom fram að eiginfjárstaða félagsins yrði áfram mjög sterk og að stjórn myndi meta frekari útgreiðslur síðar á árinu. Í ljósi þess að samruni Kviku og Arion banka verður ekki að veruleika er nú til staðar aukið svigrúm til að skila fjármunum til hluthafa,“ sagði um nýjustu arðgreiðsluna í tilkynningu Kviku til Kauphallar í maí. 

Í júlí 2025 tilkynntu forsvarsmenn Arion banka og Kviku að bankarnir ætluðu að hefja samrunaviðræður. Fallið var frá sameiningu eftir forviðræður bankanna við Samkeppniseftirlitið og afstaða stofnunarinnar varð ljós. 

Kvika gekk frá sölu á tryggingafélaginu TM til Landbankans í fyrra og fékk fyrir það 32,3 milljarða króna. Í kjölfar sölunnar skilaði Kvika til hluthafa mestu fjármunum í sögu félagsins, að sögn stjórnenda, eða samtals 27 milljörðum í formi arðgreiðslna og endurkaupa.

Til stendur að greiða nýjustu arðgreiðsluna út til hluthafa þann 10. júní.

Fréttin hefur verið uppfærð.