Vignir Vatnar tryggði sér sigur á sterku boðsmóti

Mótið fór fram í dag en ellefu sterkir skákmenn börðust þar um meistaratitilinn, þar af sjö stórmeistarar.

Um var að ræða gríðarlega öflugt boðsmót þar sem að í fyrri umferðinni var tefld einföld umferð, allir við alla, alls 11 umferðir.

Fjórir efstu keppendurnir tryggðu sér sæti í úrslitahluta mótsins þar sem tefld voru undanúrslit og svo úrslit.

Vignir lagði Jóhann Hjartarson að velli nokkuð örugglega í úrslitaeinvíginu, 2-0, og tryggði sér þar með meistaratitilinn á Green Diamond Invitational og 250 þúsund krónur.

Jóhann endaði því í öðru sæti mótsins og tryggði sér 150 þúsund krónur en einvígi Arnar Leós Jóhannssonar og Bjarnar Þorfinssonar bauð upp á örlítið meiri spennu. Í stöðunni 1-1 fór fram úrslitaskák þeirra á milli um þriðja sæti mótsins og þar hafði Björn betur og tryggði sér 100 þúsund krónur.