Hefur aldrei haldið á Ólympíugullinu sínu

Madias Nzesso sjálfa grunar að umrædd Ólympíugullverðlaun séu einhvers staðar í skúffu í höfuðborg Kamerún. Hún fékk þau sjö árum of seint, eftir að þrjár lyftingakonur sem enduðu ofar henni á Ólympíuleikunum í London 2012 voru dæmdar úr leik fyrir lyfjamisnotkun.

Nzesso hefur aldrei haldið á þessum verðlaunum, þar sem hún hefur ekki snúið aftur til heimalands síns á þeim fjórtán árum sem liðin eru frá því hún kom fyrst til Bretlands.

Nzesso, sem nú býr í Nottingham, hafði ekki ætlað sér að vera um kyrrt en þurfti að taka stóra ákvörðun því á meðan á leikunum stóð varð kynhneigð hennar kunn. Þar sem samkynhneigð er ólögleg í Kamerún og varðar fangelsi, var það raunverulegur ótti um líf sitt sem rak þessa þá tvítugu konu til að stinga af úr Ólympíuþorpinu.

„Eftir að ég lauk keppni árið 2012 var ekki auðvelt að vera um kyrrt, en ég varð að taka ákvörðun fyrir öryggi mitt, fyrir framtíð mína, því ég sá að ég átti mér enga framtíð lengur í Kamerún,“ sagði Nzesso við breska ríkisútvarpið.

„Ég er lesbía, ég elska konur og það er ekki leyfilegt í Kamerún. Ég varð að vera hér til að eiga góða framtíð, gott líf og ekki skaða sjálfa mig ef ég tæki þá ákvörðun að eignast kærustu,“ sagði Nzesso.

Þótt hún hafi fengið ákveðið skjól með því að forðast að snúa aftur til afrísku þjóðarinnar var reynsla hennar næstu mánuði langt frá þeim „glæsilegu“ tveimur vikum sem hún hafði upplifað á Ólympíuleikunum. Án vina, heimilis og peninga verður hún næstu mánuðum að mestu leyti á götunni.

Nú, fjórtán árum eftir Ólympíuleikana í London 2012, mun Nzesso snúa aftur á stóran íþróttaviðburð þegar hún keppir á Samveldisleikunum í Glasgow 2026 fyrir nýja heimaland sitt, England.

„Þessi stund þýðir mikið fyrir mig,“ sagði lyftingakonan, sem vann brons á Evrópumeistaramótinu fyrir Breta fyrr á þessu ári. „Að enska liðið hafi gefið mér þetta annað tækifæri, það er magnað,“ sagði Nzesso.