„Evrópu­sam­bandið er ekki konfektkassi“

„Ef þú ferð í aðlögunarviðræður við Evrópusambandið er það með það að markmiði að ganga í Evrópusambandið. Ísland er eina ríkið í sögu Evrópusambandsins þar sem stjórnvöld hafa einungis lýst áhuga á aðild en telja nauðsynlegt að hefja þjóðaratkvæðagreiðslu hvort við eigum að fara í viðræður,“ segir Guðrún, sem var til viðtals í Reykjavík síðdegis.

„Mér finnst ríkisstjórnin enn skulda þjóðinni skýringar,“ segir Guðrún spurð út í viðtal forsætisráðherra, Kristrúnar Frostadóttur, í Bítinu í morgun.

„Samningsmarkmiðin eru ekki skýr. Ríkisstjórnin hefur ekki gefið það út; hvar eru þessar girðingar sem verður ekki farið yfir?“ spyr Guðrún og nefnir sjávarútvegsmálin sem dæmi en mikið hefur verið rætt um það í aðdraganda þjóðaratkvæðisins hvort Ísland muni geta fengið varanlegar undanþágur frá sjávarútvegsstefnu ESB.

„Ég dreg það mjög í efa að við séum að fara að breyta Evrópusambandinu,“ segir Guðrún.

Guðrún gagnrýnir þá dagsetningu sem valin var fyrir þjóðaratkvæðagreiðsluna.

„Þessi dagsetning á þessari þjóðaratkvæðagreiðslu er úthugsuð – ekki með hagsmuni þjóðarinnar að leiðarljósi heldur ríkisstjórnarinnar.“

Hún segir dapurlegt að ríkisstjórnin forgangsraði að tvístra þjóðinni í stað þess að hlusta á heimili og fyrirtæki í landinu. Guðrún segir sumar fjölskyldur hættar að hittast þar sem foreldrar og börn ætli að kjósa sitt hvorn valkostinn í þjóðaratkvæðinu.

„Hvar sem maður kemur er fólk að rífast um þetta.“