Komst ekki í undan­úr­slit þrátt fyrir að hafa unnið sinn riðil

Yohann Ndoye Brouard ætlaði að tryggja sig þægilega í undanúrslit þegar hann synti í 200 metra baksundi. Þegar hann kláraði var hann hraðastur allra og virtist vera öruggur í undanúrslit. Samlandar hans, Mewen Tomac og Nathan Muratory, vissu tímann hans Brouard og lögðu þeir sig alla fram til að bæta hann.

Tomac og Muratory náðu báðir að bæta tímann hans Brouard en hann var með fimmta hraðasta tíma allra og ætti því að vera öruggur í undanúrslitin. Hann komst ekki áfram í undanúrslitin þar sem það mega ekki fleiri en tveir vera frá hverju landi í undanúrslitunum. Þrátt fyrir að vera með fimmta hraðasta tímann í heildina var hann þriðji hraðasti Frakkinn og fær því ekki að taka þátt í undanúrslitum.

Eftir keppnina var Brouard skiljanlega svekktur þar sem hann gaf sig ekki allan í undankeppnina.

„Ég átti smá orku eftir en ég vanmat mótherjana mína. Mig langaði virkilega að ná verðlaunasæti í 200 metra baksundi, en þeir vildu líka ná því,“ sagði Brouard eftir að hafa fallið úr leik.

Sextán sundmenn komast í undanúrslitin en Antoine Herlem, annar franskur sundkappi, var með þrettánda hraðasta tímann og fær því ekki heldur að taka þátt í undanúrslitunum. Frakkland er eina landið sem missir sundkappa úr undanúrslitum þar sem of margir Frakkar eru í undanúrslitum.