Tveir hand­teknir er­lendis vegna mann­drápsins

Þetta segir E. Agnes Eide Kristínardóttir í samtali við fréttastofu. 

Tilkynnt var um líkamsárás í heimahúsi í Kópavogi síðdegis á sunnudag, en maðurinn sem fyrir henni varð var fluttur á Landspítalann og lést þar síðdegis hinn sama dag.

„Í raun og veru kemur útkall um mann utandyra með áverka og lögreglan fer í það og í ljós kemur að þarna er maður með mikla áverka. Hann er fluttur á slysadeild og í kjölfarið fáum við málið til rannsóknar. Það er nú þegar búið að handtaka ellefu manns, sumir eru lausir, aðrir eru í gæsluvarðhaldi, sumir eru enn þá bara í fangageymslu. Tveir hafa verið handteknir erlendis. Við teljum að þarna hafi verið ráðist á þennan aðila innandyra í húsinu og til þess hafi verið notað eggvopn,“ segir E. Agnes.

Húsleit víða

Elín Agnes segir enn fremur að lögregla hafi ráðist í húslet víða og einnig leitað í bifreiðum.

Hún vill þó ekki gefa upp hvar var ráðist í leit eða á hve mörgum stöðum.

Lögregla réðst meðal annars í handtökur í Gnoðavogi í Reykjavík í kjölfar árásarinnar en Agnes segir lögreglu hafa fengið upplýsingar þess efnis að hinir grunuðu væru þar niður komnir.

Einn í hvoru Evrópulandinu

Hún segir að lögregla sé ekki komin svo langt áleiðis í rannsókn málsins til þess að geta tjáð sig um það hvort málið sé talið tengjast skipulagðri brotastarfsemi. Það sé meðal þess sem skoðað sé í viðamikilli rannsókn málsins, sem sé í raun á frumstigi.

Lögregla hafi þegar notið aðstoðar Europol og lögregluyfirvalda í tveimur Evrópulöndum, þar sem einn hafi verið handtekinn og úrskurðaður í gæsluvarðhald, í hvoru landi fyrir sig.

Sá sem kærði gengur laus

Lögreglan greindi frá því í tilkynningu á mánudag að íslenskur ríkisborgari annars vegar og erlendur ríkisborgari hins vegar hefðu í Héraðsdómi Reykjaness verið úrskurðaðir í gæsluvarðhald að kröfu Lögreglunnar á höfuðborgarsvæðinu í þágu rannsóknar hennar á manndrápinu.

Þar sagði að annar mannanna hefði verið úrskurðaður í gæsluvarðhald til 21. ágúst, en hinn til 17. ágúst.

Í gær var þriðji maðurinn úrskurðaður í varðhald til 14. ágúst og verjandi hans sagði í samtali við fréttastofu að gæsluvarðhaldsúrskurðurinn yrði kærður. Sá er nú laus úr haldi, að sögn Elínar Agnesar, en hinir eru enn í haldi.

Í heildina hafi ellefu verið handteknir hérlendis og einhverjum þeirra hafi þegar verið sleppt en aðrir séu ýmist í gæsluvarðhaldi eða í fangageymslu. 

Heimilt er að halda grunuðum manni í fangageymslu í sólarhring án gæsluvarðhaldsúrskurðar. 

E. Agnes segir að lögregla hafi ekki tekið ákvörðun um það hvort farið verði fram á gæsluvarðhald yfir þeim sem nú eru í fangageymslu. Hún kveðst ekki geta tjáð sig um aldur, þjóðerni eða kyn þeirra.