Evrópskir hægri­menn eru Evrópusinnar

Sjálfstæðisflokkurinn valdi sér evrópska samstarfsflokka haustið 2023. Þá gekk hann sem aukaaðili í European People's Party, EPP, flokkafjölskyldu evrópskra mið-, hægri- og kristilegra lýðræðisflokka. Það var tveimur árum eftir að Sjálfstæðisflokkurinn sagði skilið við ECR, samtök ESB-gagnrýnna íhaldsflokka. Miðflokkurinn gekk í ECR í júní síðastliðnum, ásamt Sönnum Finnum og Danmarksdemokraterne.

Í EPP er afstaðan skýr. Moderaterna í Svíþjóð, Kokoomus í Finnlandi og Konservative í Danmörku styðja aðild ríkja sinna að Evrópusambandinu. Í Noregi, landinu sem líkist okkar mest, með EES-samning, eigin gjaldmiðil og stóran sjávarútveg, vill Høyre að landið gangi í Evrópusambandið. Høyre hefur nákvæmlega sömu stöðu innan EPP og Sjálfstæðisflokkurinn.

Þetta eru hægrimenn sem hafa metið hagsmuni sinni þjóða og komist að þeirri niðurstöðu að í heimi hernaðarógnar úr austri og árása á frjáls milliríkjaviðskipti úr vestri, sé betra að vera hluti af Evrópusambandinu en utan þess.

Um helgina verður ekki kosið um aðild. Spurningin er: „Á Ísland að hefja á ný aðildarviðræður við Evrópusambandið?" Ríkisstjórnin hefur heitið því að aðildarsamningur fari síðan í sérstaka þjóðaratkvæðagreiðslu. Þetta er það sama og Bjarni Benediktsson, fyrrverandi formaur Sjálfstæðisflokksins, lagði til fyrir rúmum áratug. Ég studdi þetta ferli þá og ég styð það núna.

Á laugardaginn ákveðum við því ekkert annað en hvort við ætlum að afla okkur upplýsinga áður en ákvörðun er tekin um aðild að Evrópusambandinu..

Afstaða núverandi forystu Sjálfstæðisflokksins gegn viðræðum er frávik frá því sem nánustu systurflokkar hans í Evrópu telja skynsamlegt. Frávik frá því sem yfirgnæfandi meirihluti frjálslyndra evrópskra hægriflokka telur skynsamlegt.

Ég er frjálslyndur evrópskur hægrimaður og flokksbundinn Sjálfstæðismaður. Ég ætla að segja já — já við viðræðum, já við upplýstri ákvörðun og já við því að þjóðin fái sjálf að eiga lokaorðið. Ef samningurinn verður lélegur, segi ég að sjálfsögðu nei.

Höfundur er stjórnmála- og stjórnsýslufræðingur og flokksbundinn Sjálfstæðismaður.