Skólaliðum sagt upp hjá borginni

Þetta segir formaður stéttarfélags. Enn sé unnið að því að ná utan um umfang aðgerðanna og borgin hafi ekki svarað fyrirspurn stéttarfélagsins.

RÚV greindi fyrst frá. Kári Sigurðsson, formaður Sameykis, fordæmir aðgerðirnar og segir þær í engu samræmi við yfirlýsingar borgarmeirihlutans um að grunnþjónustu verði hlíft í aðhaldsaðgerðum. 

Skólaliðar sinni ekki einungis þrifum og séu til staðar fyrir nemendur. Ljóst sé að starfsfólkið sem komi í staðinn verði ekki hluti af skólaumhverfinu.

„Þarna eru börn og ungmenni að missa mikilvæga aðila í skólunum frá sér.“

Hefur áhrif á nítján skóla

Í júlí samþykkti Innkaupa- og framkvæmdaráð Reykjavíkurborgar að taka tilboðum Daga og Sólar í þrif á fjölda skóla.

„Þetta eru nítján skólar í heildina sem er verið að útvista þrifunum í,“ segir Kári. Þeirra á meðal eru Grandaskóli, Hagaskóli, Melaskóli, Brúarskóli, Hvassaleitisskóli, Vesturbæjarskóli og Klettaskóli. Kári bendir á að vinna við útvistunina hafi byrjað í tíð fyrri borgarstjórnar.

Hann bíður enn eftir því að fá staðfestar tölur um uppsagnir frá borginni og segir að fyrirspurn hafi staðið ósvöruð frá því í júlí.

Fréttin er í vinnslu.