„Mjög ná­lægt þessu og fáum sann­gjarna umspil núna“

Þorsteinn fór yfir þessi mál á blaðamannafundi á Laugardalsvelli í dag þegar hann kynnti til leiks talsvert mikið breyttan landsliðshóp Íslands, fyrir komandi leiki við Króatíu 9. og 13. október.

Sigurliðið úr einvígi Íslands og Króatíu spilar tveggja leikja úrslitaeinvígi við Portúgal eða Norður-Írland, í lok nóvember og byrjun desember, um sæti á HM.

Þegar Ísland missti af síðasta heimsmeistaramóti, með tapi í framlengdum leik gegn Portúgal haustið 2022, var aðeins um eins leiks einvígi að ræða og var dregið um það hvort Ísland eða Portúgal yrði á heimavelli. Portúgal hafði þar heppnina með sér eins og Þorsteinn rifjaði upp í aðdraganda einvígisins við Króatíu.

„Við gerum okkur grein fyrir að þetta er strembið verkefni. Krefjandi að komast í gegnum þetta. En maður trúir því alltaf og ætlar að stíga þetta skref. Þetta hefur ekki gengið hingað til en við vorum nálægt þessu síðast, og nálægt umspilinu fjórum árum áður,“ sagði Þorsteinn á blaðamannafundi í dag.

„Við erum mjög nálægt þessu núna og fáum sanngjarnara umspil núna. Ekki dregin á útivöll gegn svipuðum andstæðingi. Það er meira réttlæti í því,“ sagði Þorsteinn sem dreymir um að stýra Íslandi á heimsmeistaramóti í Mekka fótboltans næsta sumar:

„Þær dreymir allar um að komast þetta, og mig líka. Ég er búinn að vera með það ansi lengi í huganum að fara á HM í Brasilíu. Það yrði eitthvað sérstakt og það ætlum við að upplifa saman.“

„Við erum betri en Króatía en þú þarft alltaf að sýna það og sanna það, leggja allt í þetta. Þetta er bara fyrsta skrefið af tveimur sem við þurfum að taka,“ sagði Þorsteinn.

Líf og Emelía koma inn sem nýliðar

Á meðal leikmanna sem koma inn í landsliðshópinn núna eru nýliðarnir Líf Joostdóttir van Bemmel úr Breiðabliki og Emelía Óskarsdóttir, framherji Danmerkurmeistara Köge, sem spilaði gegn Arsenal í Meistaradeild Evrópu í vikunni.

„Ég horfi á Líf sem bakvörð. Hún er búin að vera góð, stóð sig vel á lokamóti EM [U19] í sumar, búin að vera jöfn og að bæta sig heilt yfir í allt sumar með Blikaliðinu,“ sagði Þorsteinn um Líf. 

Aðspurður hvort hann teldi Emelíu tilbúna til að koma beint inn í landsliðið eða hvort hún væri frekar fengin til að kynnast hlutunum svaraði Þorsteinn:

„Bæði og. Hlutirnir geta breyst mjög hratt. Hún er að koma til baka eftir erfið meiðsli sem héldu henni frá vellinum í rúmt ár. Hún hefur verið að stíga vel upp undanfarið, gerði vel gegn Arsenal og hefur verið mjög flott með Köge. Hún er vaxandi, komin með sinn hraða og kraft aftur. Svo er það þannig að þegar ég gef leikmanni tækifæri þá er það hans að sýna og sanna að hann eigi það skilið.“