„Einn aðili sem hefur til þessa skilað auðu“

Vilhjálmur Birgisson formaður Starfsgreinasambandsins segir það ekki góða sendingu í samtal um hvort kjarasamningar haldi að fjármálaráðherra segi það ekki rétt að launþegar hafi það verra nú en áður og að Ísland geti þolað þann sársauka sem felst í að ná aga á ríkisfjármálunum enda standi heimilin vel.

„Við getum bara tekið sem dæmi að það er allt launafólk að fá á sig skattahækkun í formi þess að framleiðni dettur út varðandi það að hækka persónuafslátt og skattþrep. Síðan eru það allar gjaldskrárhækkanir sem er búið að boða.“

Í samtali um forsendubrest kjarasamninga hafi sveitarfélögin gefið út að þau ætli að halda hækkunum almennra gjaldskráa innan við 2,5%.

„Við erum búin að fá risastóra aðila í verslun og þjónustu til að taka þátt í þessu. Það er einn aðili sem hefur til þessa skilað auðu og það er þessi maður sem talar um að heimilin geti þolað sársauka. Þetta er algjörlega með ólíkindum, einfaldlega vegna þess að það ættu að vera stjórnvöld sem ættu að vera leiðandi í þeirri vinnu að ná niður verðbólgu og vöxtum eins og þau lofuðu þegar þau voru kosin til þess að stjórna þessu landi.“

Í viðtali við fjármálaráðherra sem finna má hér að ofan segir hann að sársaukinn við að ná aga í ríkisfjármálum sé lítill. Vilhjálmur segir það á skjön við upplifun sinna félagsmanna.

„Við áttum okkur ekki á þessum ummælum hvað þetta varðar, en við vitum hins vegar að það sem leikur verka- og láglaunafólk verst er mikil verðbólga og hátt vaxtastig, vegna þess að þetta leitar allt út í verðlag, út í húsaleiguna, út í lánin og svo framvegis.“