Innlent

Tveir létust í fjögurra bíla á­rekstri á Austur­landi

Tómas Arnar Þorláksson skrifar
kerti

Tveir létust í fjögurra bíla árekstri sem varð rétt fyrir hádegi í gær á Jökuldalsheiði við Háreksstaðakvísl. Tilkynnt var að átta væru um borð í bifreiðunum. Þeir látnu voru erlendir ferðamenn á sjötugsaldri.

Þetta kemur fram í tilkynningu frá lögreglunni á Austurlandi.

Tvær þyrlur Landhelgisgæslunnar, sjúkraflugvélar, björgunarsveitarmenn, lögregla, sjúkralið og Rauði krossinn tóku þátt í aðgerðum. Hópslysaáætlun var virkjuð á Austurlandi í kjölfar árekstursins. Tveir erlendir ferðamenn voru fluttir alvarlega slasaðir til Reykjavíkur og eru þungt haldnir.

„Aðrir voru í kjölfar slyssins færðir til aðhlynningar á Heilbrigðisstofnun Austurlands á Egilsstöðum. Þeir voru útskrifaðir samdægurs. Meiðsli talin minniháttar,“ segir í tilkynningunni.

Samkvæmt sjónarvotti átti slysið sér stað uppi á Jökuldalsheiði þar sem ein bifreið sást utan vegar og önnur á hvolfi. Óljóst sé hvernig slysið bar að, vegurinn hafi verið hálkulaus og almennt gott skyggni.

Hér fyrir neðan má lesa tilkynningu lögreglu í heild sinni:

Tveir erlendir ferðamenn á sjötugsaldri létust í umferðarslysi í gær á þjóðvegi 1 við Háreksstaðakvísl.

Þá voru tveir fluttir alvarlega slasaðir á sjúkrahús með sjúkraflugi til Reykjavíkur, erlendir ferðamenn einnig.

Aðrir voru í kjölfar slyssins færðir til aðhlynningar á Heilbrigðisstofnun Austurlands á Egilsstöðum. Þeir voru útskrifaðir samdægurs. Meiðsli talin minniháttar.

Rannsókn á tildrögum slyssins er í höndum lögreglunnar á Austurlandi og Rannsóknarnefndar samgönguslysa.

Lögreglumál Umferðaröryggi Samgönguslys Múlaþing

Mest lesið


Fleiri fréttir

Sjá meira


×

Mest lesið