Við­ræður VR við SA á leið inn „blind­götu“

Innan við sólarhringur er nú þar til frestur til þess að segja upp kjarasamningum VR, LÍV og fagfélaganna annars vegar og SA hins vegar rennur út. Félögin hafa boðað að samningum verði sagt upp og að samkomulag sem breiðfylking stéttarfélaga gerði við atvinnurekendur í gærkvöldi breyti engu.

Engar viðræður eiga sér nú stað á milli aðila og segir Halla Gunnarsdóttir, formaður VR, stöðuna grafalvarlega.

„Við skynjum engan samningsvilja hjá Samtökum atvinnulífsins og það lítur út fyrir það að þetta sé á leiðinni inn í einhvers konar blindgötu,“ segir hún.

Á meðal þess sem liðkaði fyrir samkomulagi annarra stéttarfélaga við VR í gær var innlegg ríkisstjórnarinnar sem enn hefur ekki verið kynnt opinberlega. Halla segir útspilið mikilvægt. Afstaða félagsins hafi þó verið sú að samningarnir snerust ekki eingöngu um framlag ríkisins.

„Ef hugmyndin er að hér leggist allir á árarnar þurfum við líka að finna það að þeir aðilar sem við sömdum við síðast og ætluðu að gera ákveðna hluti, að þeir ætli að leggjast á árarnar með okkur.“

Samninganefnd VR mætti lausnamiðuð og með hóflegar væntingar til viðræðna, að sögn Höllu. Hún hafi einnig komið með óskir um að staða stórra hópa í félaginu væri viðurkennd á einhvern hátt.

„Það gerir forsætisráðherra með sínu útspili en við þurfum að fá þessa viðurkenningu með einhverju móti frá Samtökum atvinnulífsins,“ segir formaðurinn.

Stjórnarfundur verður haldinn hjá VR síðdegis og segist Halla gera ráð fyrir að aðildarfélögin kalli sína hópa einnig saman.

Geti ekki opnað á aukinn kostnað

Bjarni Benediktsson, framkvæmdastjóri SA, segir samtökin reiðubúin að samþykkja sambærilega styttingu núgildandi kjarasamnings VR, LÍV og fagfélaganna líkt og samið var um við breiðfylkinguna í gær.

Samtal um aðra útfærslu fyrir félögin eða forsendur fyrir styttingu hjá ríkissáttasemjara í dag hafi ekki skilað árangri. Því sé stál í stál eins og stendur.

„Við sýnum stöðu viðsemjenda okkar skilning þótt við getum ekki höggvið á hnútinn,“ segir Bjarni.

SA leggi áherslu á að núgildandi samningar haldi þrátt fyrir að þeir séu krefjandi fyrir atvinnulífið þar sem vextir séu háir og verðbólga hafi ekki hjanað í samræmi við vonir.

„Við höfum verulegar áhyggjur af samkeppnishæfninni og sjáum að launahækkanir í gildandi samningi verða krefjandi fyrir fyrirtækin. Þess vegna getum við ekki opnað á samtal sem leiðir til aukins kostnaðar á samningstímanum. Það verður einfaldlega að skapa verðmætin áður en þeim er skipt.“

Fréttin hefur verið uppfærð með viðbrögðum framkvæmdastjóra SA.