Fé­lag Hákonar hótar lögsóknum eftir mikið á­fall

Forráðamenn Lille eru æfir yfir niðurstöðunni í ljósi þess að leikmaðurinn sem braut á Santos þegar hann meiddist, Amir Richardson miðjumaður Le Havre, fékk ekki svo mikið sem gult spjald.

Telja þeir með öllu óskiljanlegt að hann hafi ekki fengið rautt spjald, sérstaklega í ljósi þess að myndbandsdómgæsla var á leiknum sem fram fór nú á laugardaginn í frönsku 1. deildinni.

Í yfirlýsingu forráðamanna Lille segir að félagið hafi krafist skýringa frá frönsku deildinni og franska knattspyrnusambandinu og að formaður franska sambandsins vísi málinu til aganefndar. Þá kveðst félagið vera að skoða allar lögfræðilegar hliðar málsins og hvort að félagið eigi rétt á bótum vegna málsins.

Í yfirlýsingu frá Le Havre er Santos óskað góðs bata og bent á að dómari leiksins hafi ekki talið að brot Richardson verðskuldaði refsingu.

Santos er aðeins 24 ára gamall en hefur nú slitið krossband í báðum hnjám á aðeins tveimur árum því hann sleit krossband í vinstra hné í október 2024.

Lille vann leikinn 1-0 og er í 2. sæti frönsku deildarinnar en á morgun sækja Hákon og félagar Englandsmeistara Arsenal heim í Meistaradeild Evrópu.