Ást­vinir þeirra sem létust í flug­slysinu bíða enn

Er þetta meðal þess sem kemur fram í umfjöllun fréttaveitunnar Reuters um málið en þar segir einnig að fjölskyldur ​farþeganna bíði óþreyjufullar svara frá yfirvöldum. Bola Tinubu forseti Nígeríu hafi fyrirskipað ‌rannsókn á flugslysinu, þann 5. október, en ættingjar hafi fengið litlar upplýsingar um orsök þess, hvort líkamsleifar hafi verið auðkenndar eða hvernig björgunarstarfinu miði áfram.

Var að íhuga rútuferð frekar

Þá á vélin að hafa verið á leið frá Benínborg til Lagos þegar hún, samkvæmt upplýsingum frá nígeríska flughernum, fórst á afskekktu svæði í suðvesturhluta ​Nígeríu eftir að ratsjársamband rofnaði.  

Fréttaritari Reuters náði tali af hugbúnaðarforritara í London, Victor Anii, en hann segir óvissuna hafa aukið á sorgina yfir missi eldri systur hans, Esther ⁠Anii, liðþjálfa í nígeríska flughernum.

Þegar hann hafi vaknað þann 5. október hafi beðið hans skilaboð frá henni þar sem hún hafi beðið hann að senda ​sér pening fyrir rútuferð. Hún hafi sagt honum að hópurinn hefði þurft að gera hlé á ferðalagi sínu í Benínborg vegna bilunar í flugvél. Hún var orðin þreytt á biðinni og íhugaði að halda ferðinni áfram landleiðina.

Nokkrum klukkustundum síðar hafi Anii borist fréttir af því að flugvél flughersins sem flaug á milli borganna tveggja, sömu og systir hans þurfti að komast á milli, hefði farist.

„Dugar ekki til“

„Við vissum ekki hvað var í gangi. Við vissum bara að við náðum ekki í hana og eiginmaður hennar náði ekki í suma vini sína ​sem voru um borð,“ sagði Anii við Reuters.

Það hafi svo ekki verið fyrr en daginn eftir, þegar flugherinn hafi birt lista yfir þá sem voru um borð, að ​fjölskyldan hafi komist að því að Esther hefði verið á meðal hinna látnu. Anii, sem hafi verið að eigin sögn verulega ósáttur við það sem hann taldi slæma upplýsingagjöf yfirvalda, hafi birt myndband ‌á netinu þar sem hann gagnrýndi ⁠framkomu flughersins við fjölskyldurnar eftir slysið.

Tveimur dögum síðar, að hans sögn, heimsótti yfirmaður í flughernum heimili foreldra hans í Abuja með tvö umslög. Í öðru var samúðarbréf. Fjölskyldan opnaði ekki hitt umslagið því hana grunaði að í því væru peningar.

„Hvað sem er í því dugar ekki til að taka sársaukann frá fjölskyldu minni,“ sagði hann.