Crespo vill mæta Chelsea

Argentínumaðurinn Hernan Crespo hefur viðurkennt að draumur hans sé að mæta Chelsea í átta liða úrslitum Meistaradeildarinnar.  Crespo er sem kunnugt er í láni hjá AC Milan frá Chelsea, en hefur verið Ítölunum gríðarlega mikilvægur í vetur í fjarveru aðalframherja liðsins, þeirra Andriy Shevchenko og Filippo Inzaghi sem báðir hafa verið mikið meiddir. Crespo náði sér aldrei almennilega á strik á þeim tíma sem hann dvaldi hjá félaginu, en hefur svo sannarlega slegið í gegn hjá ítalska liðinu og skoraði bæði mörk liðsins þegar Milan sló Manchester United út í sextán liða úrslitunum í Meistaradeildinni. "Ég myndi svo sannarlega vilja mæta Chelsea í keppninni.  Ég ber ekki kaldar taugar til þeirra, þeir eru frábært félag og mér fannst að mörgu leiti fínt að leika fyrir þá.  Það hentar mér hinsvegar betur að leika með Milan og þar líður mér vel", segir Crespo sem vonar að hann verði keyptur til ítalska liðsins þegar lánssamningur hans rennur út.