Eiður sakaður um leikaraskap

Leikmenn enska knattspyrnuliðsins Liverpool saka Eið Smára Guðjónsen um að hafa látið sig detta viljandi til þess að Spánverjinn Xabi Alonso í liði Liverpool myndi fá gult spjald í leik Chelsea og Liverpool á miðvikudaginn. Vegna spjaldsins verður Alonso í leikbanni í seinni leik liðanna í Meistaradeild Evrópu sem fram fer á þriðjudaginn. Eiður er einnig sakaður um að hafa viðurkennt það strax í kjölfar atviksins að hann hafi ætlað sér að koma Alonso í leikbann. Þessu neitar Eiður Smári og segir að hann myndi aldrei leggjast svo lágt að reyna vísvitandi að fiska gult spjald á leikmann úr öðru liði.