Ferguson í Noregi

Alex Ferguson, knattspyrnustjóri Manchester United er staddur í Noregi í dag, þar sem hann er að gera allt sem í hans valdi stendur til að greiða fyrir kaupum félagsins á nígeríska unglingnum John Obi Mikel. Þetta kemur fram í norskum fjölmiðlum í dag. "Við höfum fyrir löngu komist að samkomulagi við Lyn um að fá John til Manchester og ætlum að reyna að ganga frá því sem fyrst," sagði Ferguson við norska blaðið VG í morgun. Mikel var búinn að semja um að fara til Manchester á sínum tíma, en ekkert varð af því þegar hann hvarf í nokkrar vikur. Nú er talið víst að hann fari til Manchester United í janúar þegar félagaskiptaglugginn opnast á ný.