Ziege að hugsa um að hætta

Þýski varnarmaðurinn Christian Ziege óttast að þrálát ökklameiðsli sem hann hefur átt við að stríða lengi séu að neyða hann til að leggja skóna á hilluna. Ziege leikur með Gladbach í þýsku úrvalsdeildinni, en lék áður á Englandi, meðal annars með Liverpool og Tottenham. "Þetta er komið á það stig að maður er farinn að hugsa hvort það taki því hreinlega að halda áfram að reyna að berjast við meiðslin," sagði Ziege í samtali við þýska blaðið Kicker. "Ég er ekki að sjá að meðferðir séu að virka á þetta og ég get ekki haldið þessu áfram endalaust," sagði Ziege, sem er 33 ára og hefur spilað 72 landsleiki fyrir Þjóðverja.