Ford íhugar sölu dótturfélaga

Forsvarsmenn bandaríska bílaframleiðandans Ford opinberuðu í síðustu viku áætlanir þess efnis að selja framleiðslu Aston Martin sportbílsins, sem framleiddur er í Bretlandi. Ford keypti 75 prósenta hlut í Aston Martin árið 1987 en lauk kaupum á öllu hlutafé í fyrirtækinu sjö árum síðar.

Að sögn Toms Hoyt, talsmanns Ford, framleiddi fyrirtækið einungis 46 bíla árið 1992 en eftir að fyrirtækið tók reksturinn yfir var blásið til sóknar og hefur nú rúmlega 30.000 bílum verið ekið út um dyr verksmiðjunnar.

Ford skilaði jafnvirði 90 milljarða króna taprekstri á fyrstu sex mánuðum ársins og hefur verið ákveðið að segja upp 30.000 manns og loka 14 verksmiðjum fyrirtækisins á næstu átta árum í hagræðingarskyni. Þá standa enn yfir viðræður á milli Ford, japanska bílaframleiðandans Nissan og hins franska Renault um hugsanlegt samstarf en horft er til þess að samstarfið muni bæta hag þríeykisins.