Mikið ber í milli Evrópu og Ameríku

Enn ber mikið í milli Bandaríkjanna og Evrópu í tilraunum til að koma aftur af stað viðræðum um landbúnaðarafurðir á vettvangi Alþjóðaviðskiptastofnunarinnar, WTO. Lagðar voru fram nýjar tillögur á fundi svokallaðs Cairns-hóps í Ástralíu, en í honum eru fulltrúar átján landa sem flytja út landbúnaðarvörur. Mark Veile, viðskiptaráðherra Ástralíu, kynnir tillögurnar á fundinum sem hófst í Cairns í Ástralíu í gær og lýkur á morgun.

Susan Schwab, sem fer fyrir sendinefnd Bandaríkjanna, segir tillögurnar fela í sér ákveðna möguleika, en Carlo Trojan, yfirsamningamaður Evrópusambandsins innan WTO, hafnaði tillögunum alfarið, með þeim orðum að Bandaríkjamenn legðu of lítið á sig.

Áströlsku tillögurnar fela í sér að Evrópusambandið auki tilboð sitt um niðurskurð tolla á landbúnaðar­afurðum um fimm prósent um leið og Bandaríkin dragi úr stuðningi við landbúnað hjá sér um fimm milljarða Bandaríkjadala, eða sem nemur ríflega 350 milljörðum íslenskra króna.

Í dag er ráðgert að Carlo Trojan og Susan Schwab hittist á sérstökum fundi utan almennra fundahalda í Cairns og ræði málin. Ekki eru þó miklar væntingar um stórtíðindi af þeim fundi.

Fari svo að svokallaðar Doha-viðræður WTO sigli alveg í strand er gert ráð fyrir að ríki taki í auknum mæli upp tvíhliða samninga um tollamál sín á milli.