Fjármálastjóri Enron í steininn

Andrew Fastow, fyrrum fjármálastjóri bandaríska orkurisans Enron, hlaut sex ára fangelsisdóm vegna aðildar sinnar að fjár- og bókhaldssvikum, sem leiddu til gjaldþrots fyrirtæksins í lok árs 2001, í Houston í Texas í Bandaríkjunum í gær.

Búist var við allt að tíu ára fangelsisdómi. Fastow viðurkenndi aðild að svikamálinu fyrir tveimur og hálfu ári ásamt þeim Kenneth Lay, fyrrum forstjóra Enron, og Jeff Skilling, eins af æðstu yfirmönnum orkurisans. Lay lést í byrjun júlí en dómur fellur í máli Skillings í næsta mánuði og á hann yfir höfði sér áratuga fangelsisvist. Fastow var lykilvitni í réttarhöldum í máli tvímenninganna.

Andew Fastow var í upphafi ákærður fyrir bókhaldssvik, innherjasvik og peningaþvætti. Hann gekkst við tveimur ákæruliðum um aðild að bókhaldssvikum sem fólu í sér að skuldir Enron voru faldar með það fyrir augum að láta sem fyrirtækið sýndi hagnað í stað taps. Hann auðgaðist verulega við sölu á bréfum sínum í félaginu en var dæmdur til að greiða til baka 30 milljónir Bandaríkjadala, jafnvirði rúmlega 2.100 milljarðar íslenskra króna, í reiðufé og eignum.