Vill konur í stjórn A. P. Møller-Mærsk

Jess Søderberg, forstjóri dönsku fyrirtækjasamteypunnar A. P. Møller-Mærsk, er sagður hafa á takteinum að fjölga konum í stjórn fyrirtækisins. Danskir karlar hafa frá upphafi verið einráðir í stjórninni og hafa konur þar aldrei átt sæti.

Søderberg sagði að loknum árlegum hluthafafundi í fyrirtækinu í gær að nú væri kominn tími til að breyta kynjahlutföllum í stjórninni. „Á næstu árum munum við sjá umtalsverðar breytingar á stjórnun fyrirtækja en konur og útlendingar munu í auknum mæli verða við borðið," sagði hann.

„Æ fleiri konu eru að koma inn í fyrirtækið en þær eru um 45-50 prósent stjórnenda. Karlmenn hafa verið ráðandi í skipaiðnaðinum fram til þessa . En það er að breytast. Í dag eru fimm af hverjum 100 aðstoðarforstjórum konum. Það mun breytast," sagði Søderberg.

Að sögn danska dagblaðsins Politiken í dag tóku hluthafar fyrirtækjasamtæðunnar tíðindunum fagnandi.

Søderberg, sem er 61 árs, tók við stjórn A. P. Møller-Mærsk í kjölfar þess að Mærsk McKinney-Møller hætti störfum fyrir aldurs sakir árið 1993. Stjórnunarhættir Søderbergs þykja óvenjulegir, allt að byltingarkenndir, fyrir hið rótgróna fyrirtæki. Hann hyggst hætta störfum eftir fjögur ár þegar hann verður 65 ára. Þá mun fjórði forstjóri A. P. Møller-Mærsk verða valinn í 102 ára sögu fyrirtækisins.