Sáttaviðræður milli DV og Jónínu Ben

Málflutningi í máli sem Jónína Benediktsdóttir höfðaði gegn DV vegna umfjöllunar um einkalíf hennar var frestað í vikunni vegna tilboðs um að dómsátt yrði gerð í málinu. Í tilboðinu felst að fjölmiðillinn greiði Jónínu bætur og biðji hana afsökunar á umfjölluninni.

DV birti í lok septmber í fyrra forsíðufrétt sem vörðuðu einkamálefni Jónínu Benediktsdóttur. Höfðaði hún einkarefsimál í vetur og stefndi blaðinu og fyrrverandi ritstjórum - þeim Jónasi Kristjánssyni og Mikael Torfasyni fyrir að brjóta gegn 229. grein hegningarlaganna þar sem segir:

"Hver, sem skýrir opinberlega frá einkamálefnum annars manns, án þess að nægar ástæður séu fyrir hendi, er réttlæti verknaðinn, skal sæta sektum eða fangelsi allt að 1 ári."

Jón Magnússon lögmaður 365 miðla staðfestir að Hróbjartur Jónatansson lögmaður Jónínu hafi lagt fram tillögu að dómssátt og þess vegna hafi málinu verið frestað. Ekki sé búið að taka afstöðu til tilboðsins. Hann vill ekki greina frá efnisatriðum þess. Hróbjartur vildi aðeins segja í samtali við NFS að ákveðnar viðræður væru í gangi um að leysa málið án dóms en hann vildi ekki ræða þær efnislega á þessu stigi.

Heimildir NFS herma að sáttartilboðið feli í sér viðurkenningu á því að brotið hafi verið gegn einkalífsrétti Jónínu og hún beðin afsökunar á þessu broti. Auk þess að hún fái bætur vegna kostnaðar og miska.

Í síðasta mánuði var gerð dómssátt í öðru máli þar sem DV var stefnt vegna umfjöllunar um mann sem lagður var inn á sjúkrahús vegna hermannaveiki. Með þeirri dómssátt féllust eigendur DV á að biðja manninn afsökunar og greiða honum miskabætur og málskostnað.