Meiðsli Eiðs ekki alvarleg

Ökklameiðsli landsliðsfyrirliðans Eiðs Smára Guðjohnsen í leiknum gegn Chelsea í Meistaradeildinni í gærkvöld voru ekki eins alvarleg og talið var í fyrstu og svo gæti farið að hann yrði klár í slaginn um helgina þegar meistararnir mæta Deportivo í deildinni.

Eiður stóð sig vel í gær og kom Barcelona í 2-1 með góðu marki, en fyrrum félagar hans í Chelsea náðu að jafna leikinn í 2-2 með miklu harðfylgi. Eiður var borinn meiddur af velli í síðari hálfleiknum og óttast var að meiðsli hans væru alvarleg, en eftir myndatöku í dag kom í ljós að hann verður væntanlega fljótur að jafna sig.