Umfjöllun: Heimir tryggði Stjörnunni sigurinn

Lánleysi Akureyringa heldur áfram í N1-deild karla en þeir töpuðu með einu marki gegn Stjörnunni í gær þar sem norðanmaðurinn Heimir Örn Árnason skoraði sigurmarkið þegar fjórar sekúndur voru eftir.

Stjarnan marði mikilvægan sigur á Akureyri, 30-29, í sveiflukenndum leik í Mýrinni. Stjarnan hélt þar með lífi í titilvonum sínum en liðið er sex stigum á eftir toppliði Hauka og á einn leik til góða. Akureyri er enn í bullandi fallbaráttu með sex stig líkt og Afturelding í sjötta og sjöunda sæti N1-deildarinnar.

Það var einstaklega fámennt í Mýrinni í gær og vel undir 100 manns að fylgjast með leiknum þótt starfsmenn og varamenn liðanna séu taldir með. Það var eins og fámennið slægi heimamenn út af laginu og liðið teldi sig vera að spila æfingaleik, slíkt var and­leysið.

Gestirnir frá Akureyri voru aftur á móti tilbúnir í verkefnið og skoruðu sex af sjö fyrstu mörkum leiksins. Akureyri gerði enn betur og náði sjö marka forystu þegar 13 mínútur voru til leikhlés, 4-11.

Þá hrökk Stjarnan í gang og skoraði tíu mörk gegn þrem fram að leikhlé og jafnaði metin í 14-14. Sóknarleikur Akureyrar hrundi þegar Jónatan Þór Magnússon var tekinn úr umferð og virtist liðið ekki hafa fundið lausnir við varnarleik Stjörnunnar í upphafi síðari hálfleiks. Stjarnan náði fljótt þriggja marka forystu, 19-16. Akureyri skoraði þrjú næstu mörk leiksins og Stjarnan svaraði með því að komast í 23-20.

Þá hrundi leikur heimamanna á ný og Akureyri komst í 26-28 þegar fimm mínútur voru til leiksloka. Stjarnan skoraði þá þrjú mörk í röð en Akureyri náði að jafna metin þegar 40 sekúndur lifðu leiks og virtist liðið hafa nælt sér í stig. Það var ekki því Akureyringurinn Heimir Örn Árnason sem fór fyrir liði Stjörnunnar í leiknum tryggði sínum mönnum sigur með marki úr erfiðri stöðu þegar fjórar sekúndur voru eftir af leiknum og Akureyri hafði ekki tíma til að koma boltanum í leik á ný.

Heimir Örn, hetja Stjörnunnar, sagði að tapið gegn Fram í Eimskipsbikarnum á mánudaginn hefði setið í mönnum.

„Ég veit ekki hvað þetta var hjá okkur. Þetta var hörmung. Það er eðlilegt að bikarleikurinn sitji aðeins í mönnum en ekki svona mikið. Við tókum seinni bylgju og hraðaupphlaup þegar við komumst inn í leikinn á ný en það hefur vantað í síðustu leikjum. Það er erfitt að eiga við þetta lið Akureyrar. Þá vantar mann til að klára þessa jöfnu leiki, þeir eru inni í öllum leikjum."- gmi