Marquis Daniels spilar með Boston næsta vetur

Marquis Daniels, fyrrum bakvörður Indiana Pacers og Dallas Mavericks, hefur náð samkomulagi við Boston Celtics um að spila með liðinu á næsta tímabili. Umboðsmaður kappans er búinn að staðfesta þetta í bandarískum fjölmiðlum.

Marquis Daniels er 28 ára og 198 sm skotbakvörður sem getur einnig spilað sem lítill framherji. Hann lék með Dallas Mavericks frá 2003-06 en hefur spilað með Indiana Pacers undanfarin þrjú tímabil.

Marquis Daniels átti sitt besta tímabil á ferlinum síðasta vetur þar sem hann skoraði 13,6 stig og tók 4,6 fráköst að meðaltali í leik með Indiana. Hann hefur skorað 9,4 stig að meðaltali í 351 leik í NBA en þar hefur hann verið í byrjunarliði í 109 leikjanna.

Marquis Daniels var nýliði hjá Dallas Mavericks þegar Jón Arnór Stefánsson kom til liðsins haustið 2003 og spiluðu þeir meðal annars saman í sumardeildinni.