Formaður og framkvæmdastjóri KKÍ verða á stjörnuleiknum

Íslendingar munu eiga í það minnsta þrjá fulltrúa á stjörnuleik NBA-deildarinnar sem fram fer í Dallas á sunnudag.

Þeir Hannes Jón Jónsson, formaður KKÍ, og Friðrik Ingi Rúnarsson, framkvæmdastjóri KKÍ, eru á leið til Dallas ásamt syni Friðriks Inga til þess að vera viðstaddir leikinn.

„Þetta er í þriðja sinn sem ég fer á stjörnuleik. Ég fór fyrst fyrir tíu árum og svo aftur fyrir tveim árum," sagði Friðrik Ingi sem var í millilendingu í Washington.

„Þetta er geysilega skemmtileg helgi. Fjörið byrjar í dag og nær svo hápunkti á sunnudag," sagði Friðrik Ingi.

Leikurinn fer fram á hinum glæsilega Cowboys Stadium og er búist við allt að 90 þúsund áhorfendum.