NBA í nótt: Boston og Cleveland áfram

Boston og Cleveland eru komin áfram í aðra umferð úrslitakeppni NBA-deildarinnar í körfubolta. Dallas minnkaði muninn í rimmu sinni gegn San Antonio þar sem staðan er nú 3-2.

Cleveland og Boston munu nú mætast í annarri umferðinni og verður fyrsti leikur liðanna nú á laugardaginn.

Cleveland vann Chicago, 96-94, í spennandi leik þar sem Cleveland var lengst af með undirtökin. Liðið náði þó aldrei að hrista gestina af sér og fékk Chicago möguleika á að jafna metin þegar um fimmtán sekúndur voru til leiksloka. Það tókst þó ekki.

Helsta áhyggjuefni fyrir Cleveland í leiknum var þó að LeBron James virtist meiðast á vinstri olnboga í leiknum og óvíst hvaða áhrif það hefur á hann í framhaldinu.

„Ég veit í sannleika sagt ekki hvað er á seyði," sagði James eftir leikinn. „Mér líður eins og ég hafi rekist í vitlausa beinið og mér líður eins og að ég sé dofinn í olnboganum."

Þrátt fyrir það var James aðeins hársbreidd að ná þrefaldri tvennu og verða þar með fyrsti leikmaðurinn í átta ár sem nær slíku í tveimur leikjum í úrslitakeppninni í röð. Hann var með nítján stig, tíu fráköst og níu stoðsendingar.

Antawn Jamison var stigahæstur hjá Cleveland með nítján stig og Delonte West var með sextán.

Hjá Chicago var Derrick Rose með 31 stig og Luol Deng 26. Cleveland vann rimmuna gegn Chicago samtals 4-1.

Boston vann Miami, 96-86, og þar með 4-1 í rimmu liðanna. Dwyane Wade, leikmaður Miami, viðurkenndi eftir leik að betra liðið hefði unnið seríuna.

Hann var með 31 stig, tíu stoðsendingar og átta fráköst í leiknum. Mario Chalmers kom næstur með 20 stig.

Ray Allen var stigahæstur hjá Boston með 24 stig, Paul Pierce með 21 og Rajon Rondo með sextán og tólf stoðsendingar.

Þá vann Dallas sigur á San Antonio, 103-81, í afar spennandi rimmu liðanna frá Texas. Leikurinn fór fram á heimavelli Dallas en San Antonio getur tryggt sér sæti í næstu umferð á heimavelli sínum á þriðjudaginn.

Caron Butler átti stórleik og skoraði 35 stig auk þess sem hann tók ellefu fráköst. Dallas hafði tapað þremur leikjum í röð í seríunni en sigur liðsins í nótt var sannfærandi.

Engum leikmanni Dallas hafði tekist að skora meira en 30 stig í leik í úrslitakeppninni síðan 2006 fyrir utan Dirk Nowitzky sem var með fimmtán stig í nótt.

Tony Parker skoraði átján stig fyrir San Antonio, Grant Hill var með tólf og Tim Duncan ellefu.