NBA: Garnett pakkaði Bosh saman í léttum sigri Boston á Miami

Boston Celtics fór illa með Miami Heat í þriðja leik liðanna í úrslitaeinvígi þeirra í NBA-deildinni í körfubolta í nótt. Þetta var fyrsti leikurinn í Boston en Miami vann tvo fyrstu leikina á heimavelli sínum. Memphis er komið í 2-1 á móti Oklahoma City Thunder eftir endurkomusigur í framlengingu.

Kevin Garnett fór á kostum í 97-81 sigri Boston Celtics á Miami Heat í þriðja leik liðanna í undanúrslitum Austurdeildarinnar. Garnett var með 28 stig og 18 fráköst í leiknum auk þess að halda Chris Bosh í 6 stigum og 5 fráköstum.

Paul Pierce var einnig sjóðheitur með 27 stig (5 af 7 í 3ja stiga skotum) og þá var Rajon Rondo með 6 stig og 11 stosðendingar en hann kláraði leikinn þrátt fyrir að fara úr olnbogalið í þriðja leikhluta. Ray Allen skoraði 15 stig fyrir Boston.

Dwyane Wade var með 23 stig og 7 stoðsendingar hjá Miami en LeBron James var langt frá sínu besta með 15 stig og 7 fráköst. Þeir hittu saman aðeins úr 14 af 35 skotum sínum. Joel Anthony kom sterkur inn af bekknum hjá Miami og var með 12 stig og 11 fráköst.

„Við gerum vel grein fyrir því hvað það er erfitt að fella meistara. Þeir fengu þrjá daga til að hlaða batteríin og við vissum að þetta er stollt lið sem ætlaði að svara töpunum í Miami," sagði Erik Spoelstra, þjálfari Miami.

Zach Randolph var með tröllatvennu, 21 stig og 21 fráköst, þegar Memphis Grizzlies vann 101-93 sigur á Oklahoma City Thunder í framlenginu og tók um leið 2-1 forystu í undanúrslitaeinvígi liðanna í Vesturdeildinni.

Oklahoma City var með 16 stig forskot í leiknum en Memphis átti frábæran endasprett, tryggði sér framlengingu, þar sem liðið skoraði 6 fyrstu stigin og leit ekki til baka eftir það.

O.J. Mayo kom með 18 stig inn af bekknum hjá Memphis og bakvörðurinn Mike Conley var einnig með 18 stig. Marc Gasol bætti við 16 stigum og Tony Allen skoraði 10 stig og spilaði flotta vörn.

Russell Westbrook var með 23 stig og 12 stoðsendingar hjá Oklahoma City en Kevin Durant, sem skoraði 22 stig, tók bara 3 skot í framlengingunni og klikkaði á þeim öllum.

„Þetta var mjög svekkjandi tap. Ég er að reyna að vera jákvæður en þetta var sárt. Við vorum 13 stigum yfir þegar fjórði leikhlutinn byrjaði og það virtist allt vera í fínu lagi hjá okkur," sagði Kevin Durant.

Úrslitakeppni NBA-deildarinnar:

Austurdeildin

Atlanta Hawks-Chicago Bulls mætast í kvöld í Atlanta

(Staðan er 1-2)

Boston Celtics-Miami Heat 97-81

(Staðan er 1-2)

Vesturdeildin

Dallas Mavericks-Los Angeles Lakers mætast í kvöld í Dallas

(Staðan er 3-0)

Memphis Grizzlies-Oklahoma City Thunder 101-93 (framlengt)

(Staðan er 2-1)