Almannavarnir leggja mikla áherslu á að fólk sé ekki á ferli á svæðinu þar sem öskufall er. Þeir sem þurfa að vera úti eru hvattir til að nota rykgrímur og hlífðargleraugu. Um tvö 200 lögreglu- og björgunarsveitarmenn eru nú að störfum á gossvæðinu.
Mikill viðbúnaður er hjá almannavörnum vegna gossins og færist hann frekar í aukana en hitt. Aðgerðum er stýrt frá Samhæfingarstöðinni í Reykjavík en einnig frá Hvolsvelli og Höfn í Hornafirði. „Staðan er þannig að þetta er mjög öflugt gos sem hefur lítið eða ekkert dregið úr síðan að það byrjaði í gærkvöldi og það er mjög mikið öskufall í byggð og á svæðinu vestur að Klaustri og að Freysnesi er mjög krítískt ástand að því leytinu til að það er mjög lítið skyggni og hættulegt að vera á ferðinni. Við höldum að flestir haldi kyrru fyrir og það hafa verið okkar leiðbeiningar að fólk haldi kyrru fyrir en þeir sem að þurfa að hreyfa sig vegna starfa verji sjálfa sig með grímu og gleraugunum," segir Víðir Reynisson, deildarstjóri almannavarna Ríkislögreglustjóra.
Skyggni á svæðinu er svo slæmt að björgunarsveitir sem hafa verið að störfum hafa þurft frá að hverfa. „Nú erum við komin með bryndreka sem Björgunarsveitin Kári í Öræfum á, sem að er að ná á þá staði sem við höfum ekki náð á áður, hann er sérstaklega útbúinn til að geta keyrt í svona aðstæðum, við erum einnig að senda annan svipaðan bíl á staðinn til þess að hjálpa til."
Víðir segir að um 200 manns séu komnir til starfa bæði í Reykjavík og á gossvæðinu. „Auk þess sem að mjög mikið af vinnunni lendir á íbúunum sjálfum og sérstaklega í sveitinni þar sem menn eru að berjast við nýborin lömb í þessum aðstæðum. Þetta er eins og svartasta nótt og eðlilega er fólk órótt og líður ekki vel."
„Þegar maður svona er að sjá eitthvað sem maður hefur ekki séð áður þá er maður eðlilega áhyggjufullur en við eigum mjög góða vísindamenn sem eru að spá fyrir um þróun mála en það er erfitt að spá hvað gerist, bara fylgjast með," segir Víðir.
Haukar
Valur
