Baldvin: Það spyr enginn hvernig maður kemst áfram

„Við vorum frábærir í fyrri hálfleiknum, en síðan gerist það sama og í útileiknum að menn fara að slaka allt of mikið á og við vorum í raun bara heppnir að fara áfram í kvöld,“ sagði Baldvin Þorsteinsson, leikmaður FH, eftir leikinn í kvöld.

FH tapaði 28-27 fyrir Initia Hasselt, en komst samt sem áður áfram í 32-liða úrslit EHF-keppninnar.

„Þetta lið er alls ekkert mikið verra en við og gengu bara á lagið í síðari hálfleik á meðan við vorum á hælunum. Við byrjum allt í einu að kasta boltanum ítrekað frá okkur og þeir refsa um leið".

„Það spyr samt enginn að því í lokin hvernig maður kemst áfram og við ætlum að selja okkur dýrt í þessari keppni“.