Andersen grunaður um vafasamt athæfi

Chris "Birdman" Andersen leikur ekkert með Denver Nuggets þessa dagana eftir að lögreglan leitaði á heimili hans. Deild lögreglunnar sem sérhæfir sig í glæpum gegn börnum sem eiga sér stað á internetinu stóð fyrir leitinni.

Andersen hefur verið undir smásjá þeirra síðan í febrúar eftir að deildin fékk upplýsingar um meint vafasamt athæfi leikmannsins skrautlega.

Ekki er búið að handtaka Andersen né gefa út handtökuskipun á hann. Málið er þó litið alvarlegum augum og Nuggets vill ekki að Andersen spili með liðinu á meðan þetta mál er í gangi.

Lögreglan hefur neitað að gefa upp smáatriði um málið sem er mjög viðkvæmt.