Oklahoma búið að jafna gegn Spurs

Strákarnir í Oklahoma City eru heldur betur ekki búnir og hafa unnið síðustu tvo leiki gegn San Antonio og eru búnir að jafna einvígið, 2-2, í úrslitum Vesturdeildar NBA-deildarinnar. Oklahoma vann í nótt, 109-103.

San Antonio var búið að vinna 20 leiki í röð áður en liðið tapaði loks gegn Oklahoma og er nú búið að tapa tveim leikjum í röð.

Oklahoma sterkara liðið allan tímann og leiddi frá upphafi. Spurs kom reglulega tilbaka, andaði ofan í hálsmálið á Oklahoma en alltaf er á reyndi gátu þeir gefið aftur í.

Það var ekki síst að þakka Kevin Durant sem var hreinlega óstöðvandi undir lokin og Serge Ibaka lagði einnig þung lóð á vogarskálarnar.

Durant endaði með 36 stig og þar af komu 18 í síðasta leikhlutanum. Ibaka skoraði 26 stig og hitti úr öllum 11 skotum sínum.

Tim Duncan skoraði 21 stig fyrir San Antonio, Kawhi Leonard 17 og Manu Ginobili var með 13.