NBA: Lakers steinlá á móti Sacramento - fjórir framlengdir í nótt

Los Angeles Lakers tapaði illa á móti Sacramento Kings í NBA-deildinni í nótt en liðið var búið að vinna þrjá leiki í röð. Fjórir leikir voru framlengdir en Miami Heat, Atlanta Hawks og Indiana Pacers unnu öll sigra í framlengingu auk þess að Oklahoma City Thunder hafði betur í framlengdum toppslag á móti Los Angeles Clippers. New York Knicks tapaði á móti Dallas og San Antonio Spurs vann Boston Celtics.

Kobe Bryant skoraði 38 stig en það var ekki nóg þegar Los Angeles Lakers steinlá 97-113 á útivelli á móti Sacramento Kings. Marcus Thornton var með 23 stig hjá Kings, Tyreke Evans skoraði 18 stig og Jason Thompson var með 13 stig og 10 fráköst. Jodie Meeks skoraði 15 stig fyrir Lakers en Dwight Howard var aðeins með 7 stig.

Kevin Durant skoraði 35 stig og Russell Westbrook bætti við 23 stigum þegar Oklahoma City Thunder vann 117-111 útisigur á Los Angeles Clippers eftir framlengingu. Oklahoma City var fyrir leikinn búið að tapa báðum sínum leikjum á móti toppliðum. Blake Griffin skoraði mest fyrir Clippers eða 23 stig en Jamal Crawford var með 20 stig. Los Angeles Clippers var búið að vinna sex leiki í röð fyrir leikinn.

LeBron James og Dwyane Wade skoruðu báðir 28 stig þegar Miami Heat vann Milwaukee Bucks 113-106 eftir framlengdan leik en liðið missti niður 18 stiga forskot í leiknum. James var einnig með 10 fráköst og 8 stoðsendingar. Chris Bosh var með 24 stig og 18 fráköst og Ray Allen skoraði 17 stig en Miami hefur nú unnið alla fimm heimaleiki sína á tímabilinu. John Henson var með 17 stig og 18 fráköst hjá Milwaukee og Brandon Jennings skoraði 19 stig.

Tony Parker skoraði 26 stig og Tim Duncan var með 20 stig og 15 fráköst þegar San Antonio Spurs vann Boston Celtics 112-100. Tiago Splitter var með 23 stig fyrir Spurs-liðið en hjá Boston var Rajon Rondo með 22 stig og 15 stoðsendingar og Paul Pierce skoraði 19 stig. Þetta var fjórði leikurinn í röð þar sem Boston fær á sig meira en hundrað stig.

O.J. Mayo (27 stig) og Vince Carter (25 stig) voru í aðalhlutverki þegar Dallas Mavericks vann New York Knicks 114-111 en þetta var aðeins annað tap New York liðsins á tímabilinu. Carmelo Anthony skoraði 23 stig fyrir Knicks og Tyson Chandler var með 21 stig og 13 fráköst.

James Harden skoraði 28 stig þegar Houston Rockets vann Chicago Bulls 93-89 en Houston-liðið var búið að tapa þremur leikjum í röð fyrir leikinn. Nate Robinson skoraði mest fyrir Chicago eða 21 stig en þetta er í fyrsta sinn sem liðið tapar þremur leikjum í röð síðan að Tom Thibodeau tók við liðinu.

Úrslit allra leikja í NBA-deildinni í nótt:

Charlotte Bobcats - Toronto Raptors 98-97

Orlando Magic - Detroit Pistons 90-74

Cleveland Cavaliers - Philadelphia 76ers 92-83

Indiana Pacers - New Orleans Hornets 115-107 (framlengt)

Boston Celtics - San Antonio Spurs 100-112

Atlanta Hawks - Washington Wizards 101-100 (framlengt) Miami Heat - Milwaukee Bucks 113-106 (framlengt)

Oklahoma City Thunder - Los Angeles Clippers 117-111 (framlengt)

Houston Rockets - Chicago Bulls 93-89

Minnesota Timberwolves - Denver Nuggets 94-101

Dallas Mavericks - New York Knicks 114-111

Phoenix Suns - Portland Trail Blazers 114-87

Sacramento Kings - Los Angeles Lakers 113-97

Golden State Warriors - Brooklyn Nets 102-93