LeBron um nýtt viðurnefni Wade: Það er hallærislegt

Það vakti talsverða athygli þegar NBA-stjarnan Dwyane Wade hjá meisturum Miami Heat gerði skósamning við óþekktan kínverskan skóframleiðanda. Sá framleiðandi heitir Li Ning.

Gefin verður út heil skólína í nafni Wade en línan kallast "Way of Wade". Fyrir vikið hefur Wade fengið nýtt viðurnefni sem er einfaldlega "Wow".

Wade hefur ekki verið að vinna með viðurnefni í tvö ár en þá hætti hann að láta kalla sig "Flash".

LeBron James, liðsfélagi Wade hjá Miami, er ekkert sérstaklega hrifinn af nýja viðurnefninu.

"Mér finnst það hallærislegt," sagði LeBron stuttur í spuna.