Pippen kýldi mann fyrir utan veitingastað

Scottie Pippen, fyrrum leikmaður Chicago Bulls, hefur hingað til verið þekktur fyrir að vera einstakt ljúfmenni en hann getur greinilega reiðst eins og aðrir.

Það sló í brýnu á milli Pippen og ónefnds manns á bílastæði fyrir utan frægan vetingastað í Los Angeles.

Fyrstu fréttir hermdu að Pippen hefði slegið manninn og síðan sparkað ítrekað í hann. Síðar hefur verið dregið úr þeim sögum en Pippen ku þó hafa slegið hann nógu fast til þess að hann var fluttur á spítala. Ekki er vitað um ástand mannsins.

Pippen var kallaður í yfirheyrslu hjá lögreglu en ekki þótti ástæða til þess að handtaka körfuboltagoðsögnina.