Bosh hetja Heat í Portland

LeBron James lék ekki með meisturum Miami Heat í NBA körfuboltanum í nótt sem lögðu Portland Trail Blazers að velli á útivelli 108-107. Chris Bosh átti stórleik fyrir Heat auk þess að tryggja sigurinn með þriggja stiga körfu þegar skammt var eftir.

Bosh skoraði sigurkörfuna þegar hálf sekúnda var eftir af leiknum. Er þetta í sjöunda sinn sem hann skorar þriggja stiga körfu sem kemur liði sínu yfir þegar innan við 10 sekúndur eru eftir af leik í aðeins tíu tilraunum.

LeBron James hvíldi í nótt vegna meiðsla í nára og lét Bosh þá meira til sín taka gegn toppliði vesturdeildar. Bosh skoraði 37 stig, tók 10 fráköst og stal 2 boltum í leiknum. Dwyane Wade skoraði 16 stig fyrir Heat.

Wesley Matthews skoraði mest fyrir Trail Blazers, 23 stig. LaMarcus Aldridge skoraði 22 stig og Robin Lopez 17.

Blake Griffin fór fyrir Los Angeles Clippers sem skellti Utah Jazz 98-90 í Los Angeles í nótt. Griffin skoraði 40 stig og tók 10 fráköst.

Chris Paul var að venju magnaður í liði Clippers. Hann skoraði 21 stig, tók 10 fráköst og gaf 9 stoðsendingar auk þess að stela 5 boltum.

Varamaðurinn Enes Kanter skoraði 17 stig fyrir Jazz og tók 12 fráköst. Marvin Williams og Richard Jefferson skoruðu 15 stig hvor.

Dwight Howard átti mjög góðan leik fyrir Houston Rockets sem lagði New Orleans Pelicans að velli 107-98. Howard skoraði 24 stig og tók 18 fráköst en tapaði 8 boltum í leiknum.

James Harden skoraði 21 stig fyrir Rockets og Chandler Parsons 19.

Ryan Anderson skoraði 22 stig fyrir Pelicans og tók 12 fráköst. Anthony Davis skoraði 18 stig ok tók 16 fráköst. Tyreke Evans skoraði 16 stig af bekknum.



Úrslit næturinnar:

Boston Celtics - Cleveland Cavaliers 103-100

Indiana Pacers - Brooklyn Nets 105-91

Toronto Raptors - New York Knicks 115-100

Washington Wizards - Detroit Pistons 106-82

Atlanta Hawks - Charlotte Bobcats 118-116

Chicago Bulls - Dallas Mavericks 83-105

Houston Rockets - New Orleans Pelicans 107-98

Memphis Grizzlies - Denver Nuggets 120-99

Milwaukee Bucks - Minnesota Timberwolves 95-117

Phoenix Suns - Philadelphia 76ers 115-101

Portland Trail Blazers - Miami Heat 107-108

Los Angeles Clippers - Utah Jazz 98-90