Durant vill að gælunafn sitt sé Þjónninn

Kevin Durant hefur átt frábært tímabil með Oklahoma City Thunder liðinu í NBA-deildinni í körfubolta og er langstigahæsti leikmaður deildarinnar með 31,5 stig að meðaltali í leik.

Það hefur eitthvað verið í umræðunni vestan hafs að Durant væri ekki enn kominn með gælunafn þótt að kappinn væri á sínu sjötta ári í NBA-deildinni.

KD bætti úr því í viðtali við Bill Simmons á ESPN sem tekið var á Stjörnuhelgi NBA-deildarinnar.

Kevin Durant vill kalla sig "The Servant" eða "Þjóninn" á íslensku.

„Ég vil þjóna öllum, liðsfélögunum, starfsfólkinu og stuðningsmönnunum," sagði Kevin Durant þegar hann var beðinn um útskýringar á nýja gælunafninu sínu.

Durant vill alls ekki að hann sé kallaður "The Slim Reaper" eða "Granni maðurinn með ljáinn" en væri alveg sáttur við að vera bara kallaður KD.