Martin Kaymer áfram með yfirburði á US Open

Það er óhætt að fullyrða að Þjóðverjinn Martin Kaymer sé búinn að vera í sérflokki hingað til á Opna bandaríska meistaramótinu sem fram fer á Pinehurst velli nr.2 en hann hefur leikið fyrstu tvo hringina á 10 höggum undir pari. Það er hreint út sagt ótrúlegt skor miðað við hvað Pinehurst völlurinn hefur reynst bestu kylfingum heims erfiður fyrstu tvo dagana en í öðru sæti, heilum sex höggum á eftir Kaymer kemur Bandaríkjamaðurinn Brendon Todd á fjórum höggum undir pari.

Í þriðja sæti á þremur höggum undir pari eru þeir Kevin Na og Brandt Snedeker en Keegan Bradley, Henrik Stenson, Brendon De Jong og Dustin Johson koma jafnir í fimmta sæti á tveimur undir.

Það virðist fátt geta stoppað Kaymer sem steig ekki feilspor á hringnum í dag, fékk 13 pör, fimm fugla og lék á 65 höggum eða fimm undir pari. Hann hefur verið í mjög góðu formi að undanförnu og sigraði meðal annars á Players meistaramótinu í síðasta mánuði.

Rory McIlroy lék ágætlega í dag, á 68 höggum eða tveimur undir pari en þegar að mótið er hálfnað er hann jafn í tíunda sæti ásamt Matt Kuchar, Chris Kirk og Jordan Spieth á einu höggi undir pari.

Mickelson nánast úr leik

Eina risamótið sem Phil Mickelson á eftir að sigra er US Open en það eru ekki miklar líkur á því að það gerist í ár. Mickelson er á þremur höggum yfir pari eftir fyrstu tvo hringina og þrátt fyrir að hafa náð niðurskurðinum þarf hann á kraftaverki að halda til að vera meðal efstu manna þegar að mótinu líkur.

Þá eru einnig litlar líkur á því að Webb Simpson kræki í titilinn á ný en þessi 28 ára kylfingur sigraði US Open árið 2012. Hann er líkt og Mickelson á þremur höggum yfir pari.

Nokkur þekkt nöfn náðu ekki niðurskurðinum

Masters meistarinn Bubba Watson fann sig alls ekki á US Open þetta árið en hann lék á 76 höggum í gær, 70 höggum í dag og endaði mótið á sex höggum yfir pari. Hann náði því ekki niðurskurðinum sem miðaðist við fimm högg yfir pari. Fleiri þekktir kylfingar heltust úr lestinni í dag en þar má helst nefna PGA-meistarann Jason Dufner, Spánverjann vinsæla Miguel Angel Jimenez og Englendinginn Lee Westwood.

Öskubuskuævintýri Fran Quinn

Á US Open eru oft óþekktir kylfingar sem ná að fanga hug og hjörtu áhorfenda en Bandaríkjamaðurinn Fran Quinn er í því hlutverki þetta árið. Quinn er 49 ára gamall en hann hefur verið atvinnumaður síðan árið 1988 og verið meðlimur á alls konar atvinnumótaröðum síðan þá. Hann hefur undanfarið spilað á Web.com mótaröðinni og þurfti að komast í gegn um tvö úrtökumót til þess að tryggja sér þátttökurétt á US Open í ár en sonur hans er kylfuberi hjá honum. Quinn hefur í gegn um árin átt mjög misjöfnu gengi að fagna og oft ekki haft neina mótaröð til að leika á en hann er jafn í 27. sæti eins og er eftir að hafa verið meðal efstu manna um tíma á fyrsta hring í gær. Áhugavert verður að sjá hvernig honum reiðir af um helgina en með góðri frammistöðu gæti hann tryggt sér þátttökurétt á komandi mótum á PGA-mótaröðinni.

US Open heldur áfram á morgun en bein útsending frá þriðja hring hefst á Golfstöðinni klukkan 17:00.