Barcelona tapaði sínum fyrstu stigum

Barcelona átti ekki eitt einasta skot á markið þegar liðið gerði markalaust jafntefli gegn Malaga á útivelli í spænsku úrvalsdeildinni í fótbolta í kvöld.

Luis Enrique stillti nánast upp sínu besta liði í kvöld, en Lionel Messi, Neymar og Pedro skipuðu framlínu katalónska liðsins. Það dugði þó ekki til.

Barcelona var miklu meira með boltann en sköpuðu sér fá færi gegn vel skipulögðu liði Malaga sem varðist vel og verðskuldaði stigið.

Þrátt fyrir jafnteflið er Barcelona enn á toppi deildarinnar með 13 stig eftir fimm umferðir, en Katalóníuliðið hefur ekki enn fengið á sig mark á tímabilinu. Malaga er í 10. sæti með sex stig.