Neymar: Ég, Suárez og Messi erum betri en Benzema, Bale og Ronaldo

Brasilíski framherjinn Neymar telur að Barcelona geti endurtekið leikinn frá 2009 þegar liðið vann þrennuna; deild, bikar og Meistaradeildina.

Barcelona er komið á toppinn í spænsku 1. deildinni, það mætir Athletic Bilbao í úrslitaleik spænska Konungsbikarsins 30. maí og er í góðri stöðu gegn Manchester City í í 16 liða úrslitum Meistaradeildarinnar.

„Við erum með lið sem getur unnið þrennuna,“ segir Neymar sem hefur spilað mjög vel á leiktíðinni og skorað 26 mörk í 32 leikjum í öllum keppnum.

Einn af stærstu fótboltaleikjum hvers árs, El Clásico, fer fram um aðra helgi þegar Real Madrid heimsækir Barcelona á Nývang.

Vinni bæði lið sína leiki um næstu helgi mun Clásico vera mjög mikilvægur, en þá getur Barcelona annaðhvort náð fjögurra stiga forystu á toppnum eða Real endurheimt toppsætið.

Bæði lið eru með lygilega góða og dýra þriggja manna framlínu. Hjá Barcelona eru það Messi, Suárez og Neymar en Madrídingar bjóða upp á BBC-þríeykið; Bale, Benzema og Cristiano Ronaldo.

Aðspurður hvort Barca-þríeykið sé betra svarar Neymar: „Það finnst mér. Við einbeitum okkur bara að okkur sjálfum. Við hugsum ekki um andstæðinginn.“

„Messi er sá besti í heiminum og Suárez er frábær markaskorari. Það er heiður fyrir mig að spila með þeim. Þetta eru tveir ótrúlega góðir leikmenn,“ segir Neymar.