Akraneskaupstaður tilbúinn í viðræður um móttöku flóttamanna

Bæjarstjórn Akraness hefur lýst yfir vilja til að hefja viðræður við velferðarráðuneytið um aðkomu sveitarfélagsins að móttöku flóttafólks frá Sýrlandi. Þetta var samþykkt á fundi bæjarstjórnar í gær.

Í tilkynningu frá sveitarfélaginu segir að bærinn hafi talsverða reynslu af móttöku flóttamanna en fyrir sjö árum síðan, 8. september 2008, tók kaupstaðurinn á móti 29 palestínskum flóttamönnum frá Al Waleed flóttamannabúðunum í Írak.

Regína Ásvaldsdóttir bæjarstjóri segir að bærinn vilji gjarnan miðla reynslu sinni af verkefninu og að bæjaryfirvöld telji það samfélagslega skyldu Íslendinga að axla ábyrgð í þeim erfiðu aðstæðum sem milljónir Sýrlendinga búa við núna. „Bæjaryfirvöld geri sér grein fyrir að móttaka flóttamanna krefjist vandaðs undirbúnings og eftirfylgni og hafi komið þeirri skoðun á framfæri opinberlega.“