Tölvupóstar Clinton enn til trafala

Fyrir rúmri viku steig James B. Comey, yfirmaður bandarísku alríkislögreglunnar (FBI) inn á blaðamannafund og tilkynnti að FBI mælti ekki með því að dómsmálaráðherra Bandaríkjanna, Loretta Lynch, ákærði Hillary Clinton, forsetaframbjóðanda demókrata, fyrir meðhöndlun sína á ríkisleyndarmálum. Lynch hefur sagst ætla að fara eftir tilmælum FBI.

Fyrrgreind meðhöndlun snýr að því að í þau fjögur ár sem Clinton gegndi embætti utanríkisráðherra, frá 2009 til 2013, notaði hún ekki öruggt tölvupóstfang sem skráð var á vefsvæði bandarísku ríkisstjórnarinnar heldur sitt eigið póstfang. Það póstfang var hýst á einkavefþjóni Clinton. The New York Times upplýsti um málið í mars í fyrra og í kjölfarið krafðist utanríkisráðuneytið þess að Clinton léti alla þá tölvupósta sem bárust henni á einkapóstfangið af hendi.

Fór svo að Clinton skilaði inn þeim 30.490 póstum sem hún taldi vinnutengda og sagðist hafa eytt 31.830 póstum sem hún sagði einkamál. Í kjölfarið var vefþjónninn hreinsaður. FBI hefur sagt nokkra þeirra tölvupósta sem hún skilaði inn innihalda leyniskjöl. Slík meðhöndlun leyniskjala er ólögleg í Bandaríkjunum.

Seinna fann FBI þó nokkur þúsund tölvupósta sem ekki hafði verið skilað inn. Þrír þeirra innihéldu leynilegar upplýsingar sem vörðuðu þjóðaröryggi.

Almenningur ósammála FBI

Þrátt fyrir að mæla ekki með ákæru sagði Comey að Clinton hefði sýnt af sér alvarlega vanrækslu í starfi og setti spurningarmerki við dómgreind hennar þar sem erlendar ríkisstjórnir hefðu átt mun auðveldara með að komast yfir leyniskjöl sem vistuð voru á einkapóstfanginu heldur en ef hún hefði stuðst við hinn hefðbundna vefþjón. „Manneskja í hennar stöðu hefði átt að vita að þetta var rangt,“ sagði Comey. Hann sagði þó að ekki væri hægt að sanna að Clinton hefði viljandi stefnt þjóðaröryggi í hættu og því ætti ekki að ákæra.

Ný könnun NBC bendir til þess að almenningur í Bandaríkjunum sé ekki sammála áliti FBI. Aðspurð um álitið sögðust 56 prósent aðspurðra vera ósammála en 41 prósent sammála. Á meðal þeirra sem lýstu yfir stuðningi við Clinton voru tuttugu prósent ósammála en stuðningsmenn Donalds Trump, forsetaframbjóðanda repúblikana, voru nær allir ósammála, eða 93 prósent. Þá sagði meirihluti Bandaríkjamanna atferlið óviðunandi.

Ekki hólpin enn

Þingmenn repúblikana í fulltrúadeildinni hafa þó ekki gefist upp. Í fyrradag kröfðust formaður eftirlitsnefndar þingsins, Jason Chaffetz, og formaður dómsmálanefndar þingsins, Bob Goodlatte, þess af dómsmálaráðherranum að fram færi rannsókn á því hvort Clinton hefði sagt ósatt, eiðsvarin, þegar hún gaf þinginu vitnisburð sinn um málið.

„Sönnunargögn sem FBI hefur safnað í rannsókn sinni á notkun Clinton á einkapóstfangi virðast ganga í berhögg við nokkra þætti eiðsvarins framburðar hennar,“ segir í bréfi þeirra. Samflokksmenn gefa þó lítið fyrir kröfu repúblikana og sagði þingmaðurinn Elijah Cummings að repúblikanar væru að sóa skattfé í örvæntingarfullri tilraun til að minnka forskot Clinton í skoðanakönnunum.

Ein stór skoðanakönnun hefur verið birt á landsvísu í kjölfar yfirlýsingarinnar og kemur hún frá Rasmussen Reports. Þar mælist Trump með 42 prósenta fylgi en Clinton 40 prósenta. Þó er Clinton með 45 prósent og Trump 41 prósent í meðaltali skoðanakannana sem RealClear Politics tekur saman.

Ein staðhæfinga Comey úr tilkynningu hans varð vatn á myllu andstæðinga Clinton sem sögðu Comey ekki þora að ákæra Clinton vegna stöðu hennar. „Við erum ekki að segja að einstaklingur í svipaðri aðstöðu sem staðinn væri að sams konar athæfi myndi ekki þurfa að taka afleiðingunum. Þvert á móti sæta slíkir einstaklingar oft einhvers konar refsingum. Við höfum hins vegar ekki komist að þeirri niðurstöðu núna,“ sagði Comey.

Þá hafa repúblikanar gagnrýnt að sést hafi til Bills Clinton, eiginmanns Hillary og fyrrverandi forseta, ganga um borð í flugvél Lynch dómsmálaráðherra og að hann hafi átt með henni fund. Lynch hefur hins vegar sagt þau ekki hafa rætt neitt er tengdist stjórnmálum. Aðeins átt vinalegt spjall.

Mikilvægur stuðningur Sanders

Bernie Sanders öldungadeildarþingmaður var sá sem komst næst því að hreppa útnefningu demókrata en laut í lægra haldi fyrir Clinton. Þau elduðu grátt silfur í kosningabaráttunni og hefur Sanders meðal annars sagt Clinton í vasa fjármálafyrirtækja sem og sagt hana vanhæfa til að gegna embætti forseta. Þau ummæli dró hann þó til baka.

Því var Clinton hæstánægð í fyrradag þegar þau komu fram saman á kosningafundi þar sem hann lýsti yfir stuðningi sínum við framboð hennar. „Ég mun gera hvað sem í valdi mínu stendur til að tryggja að hún verði kjörin,“ sagði Sanders.

Sanders lét eftirminnileg ummæli um tölvupósta Clinton falla í fyrstu kappræðum demókrata síðasta haust. „Öllum er sama um fjandans tölvupóstana þína!“ Þó sagði hann þá grafalvarlegt vandamál þegar leið á kosningabaráttuna.

Stuðningurinn er mikilvægur fyrir Clinton en könnun NBC sem gerð var fyrir yfirlýsinguna benti til þess að 63 prósent stuðningsmanna Sanders gætu hugsað sér að kjósa Clinton en tíu prósent myndu skipta yfir til Trump. Þá vonast hún eflaust til þess að aukinn stuðningur hjálpi sér að sigra Trump en í könnun Quinnipiac-háskólans sem birtist í gær má sjá að Trump hefur náð að vinna upp forskot Clinton í baráttufylkinu Ohio og náð forskoti á hana í baráttufylkjunum Flórída og Pennsylvaníu þar sem Clinton leiddi í lok júní.

Lögin sem Clinton er sökuð um að hafa brotið vegna einkapóstfangsins:



Andstæðingar Clinton hafa bent á þrenn lög sem Clinton á að hafa brotið með notkun sinni á einkapóstfanginu. Fréttastofa Independ­ent Journal tók þau saman og útskýrði.

Lög um meðhöndlun leyniskjala

Alríkislög kveða á um að ólöglegt sé að senda leyniskjöl á óörugga einkapóstþjóna. Blaðamaður Daily Caller segir Clinton hafa brotið þau lög með því að styðjast við einkavefþjón í stað vefþjóns hins opinbera. Bendir Daily Caller á að John Deutch, fyrrverandi yfirmanni leyniþjónustu Bandaríkjanna, CIA, hafi verið vikið úr starfi fyrir að nota einkapóstfang sitt til að senda leyniskjöl.

Lög um skjalavörslu

Lög um skjalavörslu frá árinu 2009 kveða á um að alríkisstofnanir skuli tryggja að öll skjöl, meðal annars tölvupóstur, séu sett á þjóðskjalasafn. Tölvupóstur Clinton, sem The New York Times segir falla undir þessi lög, var ekki sendur til utanríkisráðuneytisins fyrr en eftir að hún lét af starfi eftir að þess var sérstaklega krafist af henni í kjölfar uppljóstrunar The New York Times.

Lög um upplýsingafrelsi

Samtökin Veterans for a Strong America hafa kært utanríkisráðuneytið fyrir brot á lögum um upplýsingafrelsi. Í viðtali við Washington Examiner sagði forsvarsmaður samtakanna, Joel Arends, samtökin hafa beðið um afrit af tölvupósti Clinton sem tengdust hryðjuverkaárás á sendiráð Bandaríkjanna í Líbýu. Sagði Arends að samtökin ættu rétt á þeim upplýsingum á grundvelli fyrrnefndra laga um upplýsingafrelsi en hefðu ekki fengið þann aðgang.

Lög um meinsæri

Þingmenn repúblikana hafa sagt að Clinton hafi framið meinsæri í vitnisburði sínum um málið þegar hún mætti fyrir rannsóknarnefnd þingsins um málið. Sögðu þeir þá ályktun byggja á misræmi í vitnisburði hennar og því sem James Comey, yfirmaður FBI, sagði um málið. Ólöglegt er í Bandaríkjunum að ljúga ef maður er eiðbundinn til að segja sannleikann líkt og Clinton var er hún gaf vitnisburð sinn.

Fréttin birtist fyrst í Fréttablaðinu