Sigmundur Davíð: Dagsetning kosninga algert aukaatriði

„Maður eyddi vikum í að birta allar upplýsingar og skila öllum gögnum sem hafði verið beðið um. En síðan kom bara í ljós að búið var að undirbúa eitthvað handrit í sjö mánuði og í mörgum löndum,“ sagði Sigmundur Davíð Gunnlaugsson, formaður Framsóknarflokksins, í Bítinu á Bylgunni í morgun.

Sigmundur Davíð hefur verið meira í umræðunni síðastliðnar vikur en mánuðina þar á undan. Undir lok síðasta mánaðar mætti hann í viðtal á Útvarpi Sögu þar sem hann fór mikinn en um svipað leiti hafði hann sent fjölpóst á skráða meðlimi í Framsóknarflokknum. Eftir að hann tjáði sig þá efuðust margir um afstöðu Sigmundar til kosninga í haust.

„Ég skrifaði grein fyrir viku síðan þar sem ég fór yfir grundvallarmál sem þyrfti að klára. Umræða um hana snerist öll um hvort bíða ætti með kosningarnar,“ sagði Sigmundur Davíð. Hann bætti því við að dagsetning kosninganna væri algert aukaatriði. „Það skiptir ekki máli hvenær er kosið svo lengi sem ríkisstjórnin hefur staðið við það sem hún hefur lofað. Það má kjósa í ágúst ef menn vilja.“

Ríkissjóði þarf að koma í sjálfbært horf

Sigmundur segir að það séu nokkur grundvallaratriði sem standi út af. Þar á meðal megi nefna kjör eldri borgara, afnám verðtryggingarinnar og þeirra sem þiggja örorkulífeyri.

„Við höfum ekki alltaf verið sammála um allt en gátum alltaf náð samkomulagi með heildarmyndina í huga,“ sagði Sigmundur. Verðtryggingin hafi verið mál sem flokkarnir voru ekki alveg sammála um. Þar hafi hins vegar verið unnin mikil undirbúningsvinna sem hafi degist á langinn af góðum og gildum ástæðum. Rétt hafi verið að bíða eftir vendingum í afnámi hafta og húsnæðismálum áður en þetta yrði tekið til meðferðar.

„Ég hef margsinnis gefið fyrirheit varðandi verðtrygginguna og lífeyrisréttindi eldri borgara og öryrkja. Um áramótin áttum við erfiða umræðu þar sem það var ákveðið að hækka ekki lífeyri þessara hópa afturvirkt. Við lofuðum að bæta kjör þeirra þegar búið væri að koma ríkissjóði í sjálfbært horf,“ sagði Sigmundur Davíð.

Formaðurinn var meðal annars spurður af þáttastjórnendum hvort hann teldi Sjálfstæðisflokkinn taka hagsmuni fárra fram yfir hagsmuni heildarinnar. „Það er eðlilegt að hafa fulltrúa ákveðinna sjónarmiða inn á þingi. Ef við skoðum til að mynda lífeyrissjóðina og verkalýðshreyfinguna þá hefur Samfylkingin varið þeirra hagsmuni. Sjálfstæðisflokkurinn hefur síðan verið að verja hagsmuni annara hópa sem þeir telja sig vera í forsvari fyrir.“

Ekki í fyrsta sinn sem Sigmundur tvíbókar

Guðni Th. Jóhannesson var settur í embætti forseta í byrjun vikunnar. Athygli vakti að Sigmundur Davíð var ekki viðstaddur innsetningarathöfnina.

„Ég var með fjölskyldunni á ferðalagi sem var löngu búið að ákveða. Þessi dagsetning lá líka fyrir fyrir löngu en þetta er ekki í fyrsta skipti sem ég tvíbóka daga,“ sagði Sigmundur. Hann segist hafa sent nýjum forseta kveðju og hann muni hitta hann í mat á næstu dögum. „Mér fannst samt skemmtilegt hve ákveðnir aðilar söknuðu mín miðað við hvað þeir eru alltaf rosalega pirraðir þegar ég er síðan á staðnum.

Viðtalið í heild sinni má heyra í spilaranum hér fyrir ofan.