HBStatz: Janus Daði aftur maður leiksins

Haukamaðurinn Janus Daði Smárason hefur stimplað sig vel inn í íslenska handboltalandsliðið í Bygma bikarnum, æfingamóti sem fer fram í Danmörku þessa dagana.

Janus Daði átti góðan leik gegn Egyptalandi í fyrradag og bætti enn frekar í gegn Ungverjalandi í Skjern í gær.

Janus Daði var markahæstur í íslenska liðinu í 27-30 tapi. Hann skoraði sjö mörk úr aðeins átta skotum.

HBStatz fylgist vel með frammistöðu íslensku strákanna og hefur nú tekið saman tölfræðiskýrslu sína frá leiknum í gær. Það er hægt að sjá úttekt þeirra á leiknum með því að smella hér.

Janus Daði fékk hæstu einkunn bæði í vörn og sókn á móti Egyptalandi hjá HBStatz. Hann fékk 8,1 í einkunn fyrir sóknarleikinn og 7,7 fyrir varnarleikinn. Heildareinkunn hans (7,9) var sú hæsta í íslenska liðinu.

Það sama var uppi á teningnum gegn Ungverjalandi í gær. Janus Daði fékk 9,5 í einkunn fyrir sóknarleikinn en auk markanna sjö gaf hann eina stoðsendingu, bjó til fimm færi fyrir liðsfélaga sína og fiskaði eitt víti.

Janus Daði fékk 8,3 í heildareinkunn fyrir frammistöðuna gegn Ungverjum. Næstur kom Björgvin Páll Gústavsson með 7,4 í heildareinkunn.

Rúnar Kárason var besti varnarmaður Íslands í leiknum í gær með 7,0 í einkunn. Rúnar var með fimm löglegar stöðvanir (þegar leikmaður brýtur af sér án þess að fá tvær mínútur eða rautt spjald) og stal boltanum einu sinni.

Besta frammistaðan í sókn á móti Ungverjum:

Janus Daði Smárason 9,5

Ómar Ingi Magnússon 7,5

Rúnar Kárason 6,9

Guðjón Valur Sigurðsson 6,2

Besta frammistaðan í vörn á móti Ungverjum:

Rúnar Kárason 7,0

Guðjón Valur Sigurðsson 6,5

Bjarki Már Gunnarsson 6,4

Guðmundur Hólmar Helgason 6,1

Besta frammistaðan í heild á móti Ungverjum:

Janus Daði Smárason 8,3

Björgvin Páll Gústavsson 7,4

Ómar Ingi Magnússon 6,9

Rúnar Kárason 6,5

Guðjón Valur Sigurðsson 6,0