Neymar er miklu verðmætari en Messi

Brasilíski knattspyrnumaðurinn Neymar er langverðmætasti knattspyrnumaður heims samkvæmt nýrri samantekt CIES Football Observatory á því hverjir eru hundrað verðmætustu fótboltamenn heimsins í dag.

Neymar sem spilar hjá Barcelona er talinn vera 246,8 milljóna evra virði sem er mun meira en liðsfélagi hans Lionel Messi sem er metinn á 170,5 milljónir evra.  246,8 milljónir evra eru tæpir 30 milljarðar íslenskra króna.

Það efast enginn um getu Lionel Messi en hér skiptir örugglega talsverðu máli að hann er fimm árum eldri en Neymar. Það er því mun meiri framtíð í Neymar þó að það bendi ekkert til þess að Messi sé á einhverji niðurleið enda verður hann er þrítugur fyrr en seinna á þessu ári.

Paul Pogba hjá Manchester United kemur síðan í þriðja sætinu en verðmæti hans er talið vera 155,3 milljónir evra eða mun meira en United borgaði Juventus fyrir hann í sumar.

Antonie Griezmann er í fjórða sæti og fimmti er síðan Luis Suarez. Barcelona á því þrjá af fimm verðmætustu fótboltamönnum heims.

Nýkjörinn besti knattspyrnumaður heims, Cristiano Ronaldo, kemst hinsvegar aðeins í sjöunda sæti listans en næstur á undan honum er Harry Kane, framherji Tottenham.

Tottenham er eina liðið í ensku úrvalsdeildinni sem á tvo á topp tíu því Dele Alli er níundi verðmætasti knattspyrnumaður heims.

Af leikmönnum í einstökum stöðum þá er Jan Oblak hjá Atletico Madrid verðmætasti markvörðurinn (59,8 milljónir evra), Raphael Varane hjá Real Madrid er verðmætasti miðvörðurinn (64 milljónir evra) og Hector Bellerín hjá Arsenal verðmætasti bakvörðurinn.

Manchester United, Chelsea, Tottenham, Manchester City, Arsenal og Leicester eiga öll leikmenn inn á topp tuttugu. Verðmætasti leikmaður Liverpool er aftur á móti Sadio Mané sem er í 39. sæti. Liverpool á reynda þrjá aðra leikmenn frá 45. til 49. Sæti.

CIES Football Observatory hefur tekið samskonar tölur saman frá árinu 2012 og nota þeir ákveðinn algóritma til að finna þetta út.  Það má sjá listann hér.